«Աբգար Մուրադյանը միայն երաժիշտ և ուսուցիչ չէր, նա նաև ծնող և լավ ընկեր էր»,- նման խոսքեր էին հնչում անվանի կլարնետահար, ՀՀ վաստակավոր արտիստ, պրոֆեսոր` Աբգար Մուրադյանի հիշատակին նվիրված համերգի ընթացքում` մասնակցությամբ Հայաստանի պետական երիտասարդական նվագախմբի:
Համերգի մենակատարներն էին ՀՀ ժողովրդական արտիստ, դաշնակահար Սվետլանա Նավասարդյանը, Դավիթ Գյուլամիրյանը (կլարնետ), Սևադա Շհոյանը (կլարնետ), Սամվել Հովհաննիսյանը, Արթուր Խաչատրյանը (կլարնետ):
Ծրագրում հնչեցին Կոմիտաս, Մոցարտ, Սամուել Բարբեր:
Երևանի Կոմիտասի անվան պետական կոնսերվատորիայի ռեկտոր Շահեն Շահինյանը, խոսելով Աբգար Մուրադյանի մասին, նշեց, որ նա անփոխարինելի է, և Կոնսերվատորիայում նրա կարիքը շատ է զգացվում: Շահինյանը տեղեկացրեց, որ Կոնսերվատորիայի գիտխորհուրդը որոշում է կայացրել սահմանել Աբգար Մուրադյանի անվան կրթաթոշակ, որը կստանա բուհի փողային ամբիոնում սովորող լավագույն ուսանողը. «Կարծում եմ՝ այդ կերպ վառ կպահենք Մուրադյանի հիշատակը, քանզի նրա կատարած աշխատանքը կոնսերվատորիայում անգնահատելի է, և շատերս անգամ չենք հավատում, որ նա չկա»:
Կլարնետահար Դավիթ Գյուլամիրյանն էլ, ով Աբգար Մուրադյանի սանն է եղել, իր ելույթից առաջ պատմեց, որ Աբգար Մուրադյանն իր համար ոչ միայն ուսուցիչ, այլ նաև ծնող է եղել, միշտ աջակցել ու խրախուսել է իր սաներին:
Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանն «Առաջին լրատվական»-ի հետ զրույցում նշեց, որ այս համերգը վկայությունն էր նրա, որ Աբգար Մուրադյանը, որպես անձ, փայլուն մանկավարժ, փայլուն անձ հիշվում է բոլորի կողմից. «Կան մարդիկ, ովքեր իրենց գործունեությամբ, գաղափարներով ապացուցում են, որ բարոյական արժեքներն են մնայուն և հիշվող»:
Սմբատյանը նշեց, որ երբ երիտասարդական նվագախումբն իր առաջին քայլերն էր անում, Աբգար Մուրադյանը եղել է իրենց կողքին և շատ է օգնել:
Նրա խոսքերով՝ շատ մեծ պատասխանատվությամբ է պատրաստվել այս համերգին, քանզի մեծ պարտականություն է նվագել բարձրակարգ երաժիշտների հետ և ներկայացնել Աբգար Մուրադյանի նման մեծ մարդուն. «Սա միայն համերգ չէր, սա ապացույցն էր, որ մենք բոլորս հիշում ենք Աբգար Մուրադյանին, ով մեր գործունեության ընթացքում, կարևոր դերակատարություն է ունեցել»:
Համերգին մասնակցում էին նաև ԽՍՀՄ ժող արտիստ, ՀՀ արվեստի վաստակավոր գործիչ, անվանի կոմպոզիտոր և հասարակական գործիչ Էդվարդ Միրզոյանը և գրող-հրապարակախոս Պերճ Զեյթունցյանը, ովքեր ևս իրենց խոսքն ասացին Աբգար Մուրադյանի մասին:
«Այս երեկոն ևս մեկ ապացույցն է Աբգարի մեծության: Ես ցավում եմ, որ Աբգարը շուտ հեռացավ մեզանից, նրա հիշատակը կա, բայց ինքը չկա: Նա շատ լավն էր և իսկապես մեծություն էր»,- «Առաջին լրատվական»-ի հետ զրույցում նշեց Էդվարդ Միրզոյանը:
Պերճ Զեյթունցյանն էլ նկատեց, որ բեմի վրա չի տեսել Աբգար Մուրադյանին, բայց լսել է վերջինիս կատարմամբ տեսագրությունները: Զեյթունցյանը հատկապես առանձնացրեց Մուրադյանի կատարմամբ Մոցարտի ստեղծագործությունները, որոնք անկրկնելի են. «Ուրախ եմ, որ մեր ժողովուրդը կարողանում է գնահատել անվանի մարդկանց, բայց շատ ցավալի է, որ նման մարդիկ պակասում են»:
