Ռուսաստանյան «Նեզավիսիմայա գազետա»-ն այսօր հոդված է հրապարակել հարավկովկասյան երեք երկրների նախընտրական իրավիճակների վերաբերյալ:
Հոդվածագիրը` Յուրի Սիմոնյանը, նախ անդրադառնում է Առևտրի համաշխարհային կազմակերպությանը Ռուսաստանի անդամակցության շուրջ հինգշաբթի օրը Ժնևում ձեռք բերված համաձայնությանը: Ապա գրում է, որ 2013 թվականին Վրաստանում սպասվում են նախագահական ընտրություններ, որին գործող նախագահ Միխեիլ Սաակաշվիլին, որը երկու անգամ զբաղեցրել է այդ պաշտոնը, Սահմանադրության համաձայն, մասնակցել չի կարող. «Փոխարենը նրան ոչինչ չի խանգարում ստանալ վարչապետի պաշտոնը, որի լիազորությունները, ըստ Սահմանադրության փոփոխությունների, ավելի լայն են լինելու, քան նախագահինը»:
Այնուհետև անդրադառնալով Հայաստանին և Ադրբեջանին՝ հոդվածագիրը նկատում է, որ այս երկրներում էլ սկսում են նշմարվել ընտրական գործընթացների նախանշաններ։ Երևանում գաղտնի հանդիպումներ են ընթանում տարբեր կուսակցությունների առաջնորդների միջև, մամուլը գրում է տարբեր դաշինքների ստեղծման մասին:
«Հատկապես ուշադրության են արժանի երկրորդ նախագահ Ռոբերտ Քոչարյանի գործողությունները, որի վերադարձի մասին շշուկները անփոփոխ բնույթ են ձեռք բերել: Եվ եթե այս ամենը ճիշտ լինի, ապա Հայաստանում խորհրդարանական ընտրություններին երեք գլխավոր կենտրոններ կձևավորվեն, որոնք ֆորմալ և ոչ ֆորմալ առումով կգլխավորեն երկրի գործող և նախկին ղեկավարները: Մնացած կուսակցությունները, ամենայն հավանականությամբ, դատապարտված կլինեն հավասարակշռողի դեր խաղալու»:
Ապա գալով Ադրբեջանի ներքաղաքական կյանքին` հոդվածագիրը գրում է, որ չի հանդարտվում նախագահ Իլհամ Ալիևի` «Ալ Ջազիրա»-ին տրված հարցազրույցի շուրջ թոհուբոհը, որի ընթացքում նա հայտարարել էր, թե դեռ չի որոշել` արդյո՞ք առաջադրելու է թեկնածությունը առաջիկա նախագահական ընտրություններում:
Ալիևը չէր հասցրել այդ մասին հայտարարել, երբ ԶԼՄ-ներում սկսեցին շրջանառվել լուրեր այն մասին, թե Ալիևների ընտանիքը ցանկանում է պահպանել իշխանությունը` Մեհրիբան Ալիևային՝ Իլհամի կնոջը, որի հայրական ազգանունը Փաշաևա է, նախագահի պաշտոնին բերելով: «Այստեղ կարելի է կիրառել նախկին ԽՍՀՄ տարածքի վերջին 20 տարիների ընթացքում տեղի ունեցած կենտրոնական իշխանության «սահմանափակման» ցանկացած սցենար»,- գրել է «Նեզավիսիմայա գազետա»-ի հոդվածագիրը:
