Այսօր Ազգային ժողովում տեղի ունեցած լսումների ժամանակ քննարկվեց կենսաչափական տվյալներով անձնագրային համակարգի մասին օրենքը՝ երկրորդ ընթերցմամբ ԱԺ քննարկմանը ներկայացնելու համար:
Ներկայացված առաջարկների հիման վրա փոփոխությունները ներկայացրեց ՀՀ փոխոստիկանապետ Արթուր Օսիկյանը: Նա նշեց, որ նոր անձնագրային համակարգին անցնելու համար նախատեսված էլեկտրոնային պահոցում պետք է ներառվեն այնպիսի տվյալներ, որոնք նախատեսված են կառավարության որոշմամբ: Նա ընդգծեց, որ պետությունը երաշխավորում է այդ տվյալների պահպանումը: Օսիկյանի խոսքերով՝ կենսաչափական տվյալներով անձնագրային համակարգի կամ, որ նույնն է, նույնականացման քարտերի շրջանառությունը կբարելավի հանրային ծառայությունների որակը, կհեշտացնի անձի նույնականացման գործընթացը, կզսպի կոռուպցիոն որոշակի գործոնների զարգացումը, քանի որ նույնականացման քարտերը կսահմանափակեն վարչական մարմնի հետ անմիջական շփումները:
Օսիկյան խոսքերով՝ կենսաչափական տվյալներով անձնագրային համակարգը ներդրվել է եվրոպական գրեթե բոլոր երկրներում, բացառությամբ Միացյալ Թագավորության և Գերմանիայի, որոնք առարկություն են ներկայացրել մատնադրոշմների պահպանման վերաբերյալ:
Օսիկյանը նկատեց, որ նույնականացման քարտերը Հայաստանի քաղաքացիներին ժամանակակից աշխարհին համահունչ քայլեր կատարելու հնարավորություն են տալիս:
Նկատենք, որ օրենքի նախնական տարբերակով նախատեսվում էր պարտադիր` ինտերակտիվ անցում նոր անձնագրային համակարգին, սակյան այսօր, ինչպես տեղեկացրեց Օսիկյանը, այս դրույքը վերանայվել է և այժմ անձը, ով չի ցանկանա ձեռք բերել նոր սերնդի անձնագիր, կարող է պահպանել իր հին նմուշի անձնագիրը, որը վավարեկան կլինի թե՛ Հայաստանում, թե՛ Հայաստանից դուրս: Օսիկյանը նշեց, որ այս դրույթը մտցվել է՝ նաև հաշվի առնելով այն հանգամանքը, որ նոր անձնագրային համակարգը ինքնարժեքի առումով ավելի թանկ է, քան հինը:
Օրենքի նախագծի առաջին ընթերցման ժամանակ նախատեսվում էր նոր անձնագրային համակարգի անցումը կատարել նոյեմբերի 1-ից: Օսիկյանը տեղեկացրեց, որ ժամկետի երկարաձգում է տեղի ունեցել մինչև հունվարի 1-ը, նաև չբացառեց, որ նոր համակարգի ներդրման գործընթացը կարող է երկարաձգվել մինչև 2012 թվականի մարտի 1-ը, հնարավոր է նաև, որ վերջնական ժամկետը հունիսի 1-ը լինի:
