Այսօր «Արմատ» մամուլի ակումբում տեղի ունեցավ ասուլիս, որի բանախոսներն էին բազկամարտի աշխարհի չեմպիոն, Եվրոպայի եռակի չեմպիոն, աշխարհի գավաթակիր Վլադիմիր Արզումանյանը և հավաքականի գլխավոր մարզիչ Արման Փիրոյանը:
Նրանք խոսեցին սույն թվականի նոյեմբերի 28-ից դեկտեմբերի 4-ը Ղազախստանի մայրաքաղաք Աստանայում կայանալիք աշխարհի առաջնության, մեր հավաքականի մրցակիցների և մի շարք այլ հարցերի շուրջ:
Մեր ընտրանու գլխավոր մարզիչը նշեց, որ հավաքականում ընդգրկված են 25 մարզիկներ, որոնք ընտրվել են` ելնելով մեկ ամիս առաջ տեղի ունեցած Հայաստանի առաջնության արդյունքներից: 25 մարզիկներից Աստանա կմեկնեն 15-ը, որոնցից 7-ը աշխարհի առաջնությանը մասնակցում են առաջին անգամ: Մեր ընտրանին ներկայացուցիչներ ունի բոլոր քաշային կարգերում` 55-110 կգ: Արման Փիրոյանը խոսեց նաև իր սպասումներից. «Նախապես մեդալների քանակ չեմ ցանկանում նշել, բայց վստահ եմ, որ դրանք կլինեն, և մենք աշխարհին մեզ ճանաչել կտանք»:
Հիշեցնենք, որ մայիսին Թուրքիայում կայացած Եվրոպայի առաջնության ժամանակ Վլադիմիր Մնացականյանը դարձավ չեմպիոն: Նա հաղթող ճանաչվեց նաև 10 օր առաջ Լեհաստանի մայրաքաղաք Վարշավայում կայացած աշխարհի գավաթի խաղարկությունում` 70 կգ քաշային կարգում:
Մեդալների հարցում վստահ էր նաև Վլադիմիր Մնացականյանը. «Մենք ունենք ուժեղ հակառակորդներ` ի դեմս Ռուսաստանի, Վրաստանի, Ղազախստանի հավաքականների, բայց մենք նույնպես ուժեղ ենք և հաղթելու մեծ հնարավորություններ ունենք»:
