ՀՀ կրթության և գիտության նախարար Արմեն Աշոտյանն այսօր ընդունել է Ֆրանսիայի Մոնպելիեի ակադեմիայի ռեկտոր Քրիստիան Ֆիլիպին և Հայաստանում Ֆրանսիական համալսարանի ռեկտոր Ժոել լը Մոնզելեկին:
Աշոտյանը կարևորել է կրթության ոլորտում հայ-ֆրանսիական համագործակցության ամրապնդումը, նշելով, որ մեր պետությունը կարևորում է Հայաստանում Ֆրանսիական համալսարանի գործունեությունը. «Մենք շահագրգիռ ենք, որ Ֆրանսիական համալսարանն իր շարունակական գործունեությամբ կրթության եվրոպական որակ և ստանդարտներ ապահովի Հայաստանում»:
Մոնպելիեի ակադեմիայի ռեկտոր Քրիստիան Ֆիլիպը նշել է, որ Մոնպելիեի ակադեմիան պատրաստակամ է համագործակցել Ֆրանսիական համալսարանի և Հայաստանի այլ բուհերի` մասնավորապես ԵՊՀ-ի և Ագրարային համալսարանի հետ:
ԿԳ նախարարը կարևորել է երկու երկրներում դիպլոմների փոխճանաչման գործընթացը և ընդգծել միջբուհական համագործակցության խորացման և զարգացման անհրաժեշտությունը:
Հանդիպման ընթացքում քննարկվել են նաև Հայաստանում ֆրանսիական լիցեյ հիմնադրելու, ինչպես նաև հայ-ֆրանսիական կրթական համագործակցությանն առնչվող այլ հարցեր:
