Իրանական 24online լրատվական կայքի փոխանցմամբ՝ վերջին շրջանում Իրանի բանկային համակարգում բացահայտված կոռուպցիայի հարցով ձերբակալվել է Կենտրոնական բանկի նախագահի տեղակալ Համիդ Փուրմոհամադին:
Հիշյալ խնդրով կազմված քննիչ հանձնաժողովի ղեկավար Մոհսենի Էժեին Իրանի պետական հեռուստաընկերության տված հարցազրույցում հայտարարել է, որ հիշյալ կոռուպցիայի հարցով ևս 2 պետական պաշտոնյա է ձերբակալվել, բայց ձերբակալվածների ինքնությունը չի բացահայտել:
24online լրատվական կայքի ունեցած տեղեկությունները հավաստում են, որ նոր ձերբակալվածների թվում է նաև ԿԲ նախագահի տեղակալը:
Հիշեցնենք, որ անցյալ ամիս Իրանի բանկային համակարգում նոր կոռուպցիա բացահայտվեց. պարզվեց, որ բանկային համակարգից ավելի քան 3 միլիարդ դոլար է կորել, որի մեծ մասը դուրս է հանվել երկրից: Բացահայտված կոռուպցիայի արդյունքում իրանական երկու պետական բանկերի տնօրեններ ազատվեցին իրենց պաշտոններից, իսկ «Մելլի» պետական բանկի տնօրենը ձերբակալվելուց խուսափելու համար դիմեց փախուստի ու ապաստան է գտել Կանադայում:
