Աշխարհի հնագույն բանկերից մեկը` իտալական Monte dei Paschi բանկը, ներդրողներից կխնդրի լրացուցիչ ֆինանսավորում: Ինչպես գրում է The Wall Street Journal պարբերականը, բանկը հայտնվել է ծանր ֆինանսական դրության մեջ, քանի որ իր հաշվում Իտալիայի կառավարությանը պետական պարտք է ունեցել:
Monte dei Paschi-ի համար անհրաժեշտ ներդրումների գումարը կազմում է 2-2,8 միլիարդ եվրո: Բանկը համարվում է Իտալիայի կառավարության խոշորագույն պարտատերերից մեկը. նրան են պատկանում երկրի պետական պարտքի՝ 164 միլիարդ եվրոյից 32,5-ը:
Պարբերականը նշում է, որ ծախսերի քչացման համար բանկը կրճատել է վարկավորման ծրագրի և Սիենտա քաղաքի քաղաքապետարանին բարեգործական նվիրատվությունների 80 տոկոսը: Բացի այդ, բանկը հոկտեմբերի կեսերին 130 միլիոն եվրոյով վաճառել է Հռոմում` Կոլիզեյի դիմաց գտնվող իր գրասենյակը:
2009 թվականին ֆինանսական ճգնաժամի ժամանակ Monte dei Paschi-ն ստիպված էր Իտալիայի կառավարությունից օգնություն խնդրել: Նրան տրամադրվել էր 1,9 միլիարդ եվրո: Բանկը համաձայնել էր տարեկան 160 միլիոն եվրո վճարել պարտքը մարելու համար:
Monte dei Paschi բանկը հիմնադրվել էր 1472 թվականին և Իտալիայում համարվում է երրորդ բանկը: Բանկի կապիտալը կազմում է 7,1 միլիարդ եվրո: 2008 թվականի տվյալներով, բարեգործական նվիրատվությունը կազմել է 200 միլիոն եվրո:
