Այսօր Ազգային ժողովում վարչապետ Տիգրան Սարգսյանը հնարավորություն ունեցավ կրկին Ազատ առևտրի գոտու պայմանագիրն անվանել «պատմական»:
Կառավարության հետ ծավալված հարցուպատասխանի ժամանակ ՀՅԴ պատգամավոր Արա Նռանյանի հարցերին, թե ի՞նչ օգուտներ և պոտենցիալ ռիսկեր կան այդ պայմանագրի հետ կապված և արդյոք ՀՀ-ն պատրաստվո՞ւմ է շարունակել ինտեգրման գործընթացը մաքսային կառույցին, պայմանագիրը չի՞ խանգարում ԱՀԿ սկզբունքներին և ԵՄ հետ ազատ առևտրի համաձայնագրին ու ասոցացման պայմանագրի կնքմանը՝ Տ.Սարգսյանը պատասխանեց, թե ձևավորվում են միասնական պլատֆորմ և միասնական խաղի կանոններ, համաձայնագրի հիմքում ընդունված է ԱՀԿ և ԱՄՀ կանոնակարգը, և այն չի հակասում ԱՀԿ հետ ՀՀ պայմանավորվածություններին, ավելին՝ լրացնում է.
«Այն ստեղծում է բացառիկ հնարավորություններ. տնտեսվարողները առանց մաքսատուրքերի վճարման կարող են գործունեություն ծավալել, սահմանափակումներ չեն լինելու: Սա քայլ էր առաջ, որովհետև երկկողմ համաձայնագրերի դեպքում սահմանափակումներ կային»:
Ա. Նռանյանի դիտարկմանը, թե Մոլդովան ստորագրել է և խնդիրներ ունի մաքսային ոլորտում եվրաինտեգրման առումով՝ վարչապետը պատասխանեց, թե այն չի խոչընդոտում եվրաինտեգրման գործընթացին. «Նոր ժամանակակից մեթոդների կիրառում է պարունակում, որ բնորոշ են ԵՄ-ին: Մենք ԵՄ գործընկերներին տեղյակ ենք պահել և խնդիր չկա»:
Սակայն, ըստ Տ.Սարգսյանի, Մաքսային միությանը անդամակցելու հետ կապված խնդիր կա. «ՀՀ-ն չունի այդպիսի նպատակ՝ անդամակցել միասնական մաքսային միությանը: Կան բազմաթիվ խոչընդոտներ, որ անհաղթահարելի են ՀՀ համար»,- ասաց կառավարության ղեկավարը՝ պարզաբանելով, որ չունենք միասնական սահման, իսկ նման նախադեպ չկա, որ սահման չունեցող պետությունները նույն մաքսային միության անդամ լինեն:
«Ժառանգություն» խմբակցության պատգամավոր Արմեն Մարտիրոսյանը հայտարարեց, թե անընդհատ խոսում են ստվերի մասին, բյուջեի եկամուտների հավելումը՝ 101 մլրդ թիվը, հերոսություն է ներկայացվում, բայց եռակին կարելի է հավաքագրել ճիշտ քաղաքականության դեպքում: Նա մատնանշեց, որ գազալցակայաններում ճնշումը նախատեսվածից ավելացնելու համար 500 դրամ ավելի է գանձվում: Երևանից դուրս գտնվող գազալցակայաններն այդ խնդիրը չունեն: «Ստվերը արևի տակ ծաղկում է, իսկ կառավարությունը ոչինչ չի ձեռնարկում»,- փաստեց Ա. Մարտիրոսյանը:
Էկոնոմիկայի նախարար Տիգրան Դավթյանը հակադարձեց, թե ընդունվել է տեխնիկական կանոնակարգ, որով պետք է տեղադրվեն դիսպերսիոն հաշվիչները, որով խնդիրը լուծվում է. «Օրենսդրական դաշտն առկա է, ունենք 400 ԼՃԿ-ներ, և մեր վերահսկողության արդյունքում մոտ 100-ը տեղադրել են: Սեպտեմբերից խիստ գործողություններ են իրականացվում, որ տեղադրվեն աշտարակները: Բոլոր սուբյեկտները ծանուցվել են, և հետամուտ ենք լինելու, որ տեխնիկական պահանջների կանոնները կատարվեն»:
Տ.Դավթյանն անպատասխան թողեց Ա. Մարտիրոսյանի հարցադրումը, թե իսկ «ձախ գնացած» գումարները անպատիժ են մնալո՞ւ, մինչև հիմա Երևանում ոչ մեկը չի տեղադրել այդ աշտարակները, և շատ խիստ միտում է երևում, որովհետև կա պայմանավորվածությունների ու հովանավորչության խնդիր:
