Հայաստանի ԱԳՆ-ում այսօր տեղի ունեցավ` ընթացող ՀՀ-ԵՄ ասոցացման համաձայնագրի բանակցությունների 7-րդ լիագումար նիստի արդյունքների վերաբերյալ ՀՀ ԱԳ նախարարի տեղակալ Զոհրաբ Մնացականյանի և ԵՄ արտաքին հարաբերությունների գլխավոր տնօրինությունում Արևելյան Եվրոպայի, Հարավային Կովկասի և Կենտրոնական Ասիայի երկրների հարցերով տնօրեն Գունար Վիգանդի համատեղ մամուլի ասուլիսը:
Զոհրաբ Մնացականյանը նշեց, որ մեկնարկած գործընթացը կապված է ընթացող բարեփոխումների հետ, և հիշատակեց Սերժ Սարգսյանի` Վարշավայի ելույթը, որտեղ նա պատրաստակամություն էր հայտնել շարունակել ժողովրդավարացմանն ուղղված աշխատանքները, դեպի եվրաինտեգրում գործընթացը: Բանակցությունների բարձր դինամիկան պահպանվում է, նշեց նա` կարևորելով մուտքի արտոնագրային ռեժիմի դյուրացման գործընթացը, ազատ առևտրի ծավալման շուրջ աշխատանքերը:
Գունար Վիգանդը նշեց «Արևելյան գործընկերության» գագաթնաժողովը ոգևորիչ քայլեր է ենթադրում, իսկ Հայաստանը, ըստ նրա, արագացրել է բարեփոխումների գործընթացը. «Բանակցությունները բերում են ավելի խոր իրավական հիմքերի առաջընթացի: Մեծ առաջընթաց ենք ունեցել իրավական, քաղաքական բնագավառներում: Մենք տնտեսական բնագավառում բազմաթիվ կանոններ պետք է համահունչ դարձնենք: Ամենախոշոր շուկաները մատչելի կլինեն ԵՄ-ի և նրա գործընկերների համար, այսինքն` նույն պայմանները կգործեն թե՛ մեր, թե՛ ձեր երկրի համար»: Գ. Վիգանդը տեղեկացրեց, որ Քեթրին Էշթոնը նոյեմբերին կայցելի Հայաստան:
ՀՀ կառավարության կողմից կան հավաստիացումներ ակցիզային ռեֆորմների, Ազատ առևտրի համաձայնագրին և Առևտրի համաշխարհային կազմակերպության պահանջներին համապատասխան քայլեր կատարելու ուղղությամբ, հավաստիացրեց Գ. Վիգանդը:
