«ՀԺ»-ն գրում է, որ երեկ պետք է լրանար ոստիկանության քրեական հետախուզության գլխավոր վարչության նախկին պետ Հովհաննես Թամամյանի գործով նախաքննության ժամկետը:
Պարզելու համար, թե արդյոք ավարտվե՞լ է գործի նախաքննությունը, թերթը դիմել է գործի վարույթն իրականացնող մարմին` ՀՀ Հատուկ քննչական ծառայություն:
«Այնտեղից հայտնեցին, որ գործի նախաքննությունը շարունակվում է և որ այն երկարացվել է երկու ամսով` մինչև դեկտեմբերի 25-ը»:
Թերթը հավելում է, որ Թամամյանը անազատության մեջ է այս տարվա մարտի 24-ից: Սեպտեմբերի 19-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանը դռնփակ դատական նիստում 3-րդ անգամ բավարարեց ՀՔԾ միջնորդությունը, և Հովհաննես Թամամյանի նկատմամբ կիրառված կալանավորման ժամկետը երկարացրեց ևս երկու ամսով: Թամամյանը մեղադրվում է ՀՀ Քրեական օրենսգրքի 308 հոդվածի 2-րդ մասով (Պաշտոնեական լիազորությունները չարաշահելը, որն առաջացրել է ծանր հետևանքներ):
