«Ժողովուրդ»-ը գրում է, որ թեև ՀՀ ԱԳ նախարար էդվարդ Նալբանդյանը ՌԴ ԱԳ նախարար Սերգեյ Լավրովի հետ հանդիպել ու Սերժ Սարգսյանի պաշտոնական այցի օրակարգը նախապես ճշտել էր, այնուամենայնիվ, երեկ մեծ դժվարությամբ, երկար սպասումներից հետո Սերժ Սարգսյանը կարողացավ հանդիպել ՌԴ վարչապետ Վլադիմիր Պուտինի հետ:
««ժողովուրդ»-ը իր մոսկովյան աղբյուրներից տեղեկացավ, որ Մոսկվա կատարած պաշտոնական այցի վերջին օրը` աշխատանքային օրվա ավարտից մի քանի ժամ անց՝ Մոսկվայի ժամանակով 22:46 րոպեին, Սերժ Սարգսյանը Պուտինի մերձմոսկովյան Նովո Օգարյովոյի նստավայրում հանդիպել է ՌԴ վարչապետի հետ: Իսկ մինչ այդ Պուտինն ու Դմիտրի Մեդվեդևը մեկնել էին Ստավրոպոլ՝ «կարևոր գործով» եգիպտացորեն հավաքելու»,- ապա թերթը հավելում է.
«Այսպիսի դեպք քաղաքագետները դժվարությամբ են հիշում, որ երկրի նախագահին մյուս երկրի վարչապետը պաշտոնական այցի շրջանակներում հանդիպի գիշերը՝ բերքահավաքից հետո: Բայց դա Սերժ Սարգսյանի մոսկովյան այցի միակ ուշագրավ դրվագը չէր: Օրակարգն այնքան փնթի էր ձևավորված, որ ՌԴ Ֆեդերալ միության պաշտոնական կայքում տեղադրված պաշտոնական հաղորդագրության մեջ երեկ նշված էր, թե Սերժ Սարգսյանը երեկոյան պետք է այցելի Լոմոնոսովի անվան համալսարան: Մինչդեռ Սարգսյանն այնտեղ եղել էր դեռ երկուշաբթի, ավելին, պատվավոր պրոֆեսորի կոչում էր ստացել: Այսքանից հետո մնում է, որ երիցս քաշքշված թշերով էդվարդ Նալբանդյանը գոնե ներողություն խնդրի մեզանից՝ ՀՀ քաղաքացիներից, երկրի ղեկավարի պաշտոնական այցը ոչ պատշաճ կազմակերպելու համար»:
