Google ինտերնետային կորպորացիան Սան Ֆրանցիսկոյում կայացած հատուկ մամուլի ասուլիսի ժամանակ ներկայացրել է իր նոր Chrome OS օպերացիոն համակարգը, դրանով աշխատող Cr-48 նեթբուքը և այդ պլատֆորմի ու Chrome զննիչի (browser) համար նախատեսված ծրագրերի առցանց խանութը,- հայտնում է vesti.ru-ն: Ըստ Google-ի գլխավոր տնօրեն Էրիկ Շմիդտի` Chrome OS-ը համացանցային հսկայի առաջին նախագիծն է, որն ի զորու է մրցել Microsoft-ի Windows, Apple-ի Mac OS X օպերացիոն համակարգերի հետ:
Chrome OS-ում կիրառվում է այսպես կոչված «ամպային» հաշվարկումների տեխնոլոգիան, այսինքն` փաստաթղթերը, ծրագրերը և մյուս ինֆորմացիան կարող է պահվել ոչ թե համակարգչի կոշտ սկավառակի վրա, այլ Google-ի սերվերների վրա և ներբեռնվել համացանցից: Այս համակարգի ներկայացման համար օգտագործվել է սեփական արտադրության Cr-48 նեթբուքը` 12,1 դյույմանոց դիսփլեյով, ամբողջական ստեղնաշարով, թաչփեդով, վեբ-տեսախցիկով և ութ ժամ աշխատելու հնարավորություն տվող մարտկոցով:
Chrome OS-ը համացանցից կարելի է ներբեռնել 60 վայրկյանում,- նշել է ապրանքների կառավարման գծով Google-ի փոխտնօրեն Սանդար Փիչայը: Նրա խոսքով` համակարգը նիրհելու (hibernate) ռեժիմից վերադառնում է գրեթե ակնթարթորեն:
Սեփական նեթբուքների վաճառքի մեկնարկի ամսաթիվը ընկերության աշխատակիցները չեն հստակեցրել, փոխարենը նշել են, որ Samsung և Acer ընկերությունների արտադրած լեփթոփները խանութներում կհայտնվեն 2011 թ. կեսին: Բացի այդ, նախատեղադրված Chrome OS օպերացիոն համակարգով ցանկացած սարք հագեցված կլինի Wi-Fi и 3G ցանցերում աշխատելու համար նախատեսված մոդուլներով:
Chrome Web Store առցանց խանութը աշխատում է այն նույն սկզբունքով, ինչ բջջային Google Android-ի համար նախատեսված Android Market-ը: Ներկա պահին վեբ պահուստում տեղադրված ծրագրերի թիվը այնքան էլ մեծ չէ, իսկ եղածների մեծամասնությունը հղումներ են դեպի այլ կայքեր: Ծրագրերի վճարման համար օգտագործվում է Google Checkout վճարման համակարգը: Chrome Web Store հիմնական տարբերությունը մյուս համացանցային խանութներից (օրինակ` Apple-ի կամ Microsoft-ի) այն է, որ ծրագրերը կարելի է ներբեռնել միայն Chrome զննիչի օգնությամբ, իսկ ծրագրեր ստեղծողները իրենց արտադրանքը տեղադրելու համար հավելյալ թույլտվության կարիք չունեն: Բոլոր ծրագրերը տեսակավորված են ըստ բաժինների, գործում է նաև օգտագործողների վարկանիշային համակարգը` ամենահեղինակավորներին որոշելու նպատակով:
