ԵԽԽՎ հայաստանյան պատվիրակության անդամ Նաիրա Զոհրաբյանը այսօր մեզ հետ զրույցում անդրադառնալով այն հանգամանքին, որ Ադրբեջանը ընտրվել է ՄԱԿ-ի ԱԽ ոչ մշտական անդամ՝ արձագանքեց. «Ես ինքս չեմ ողջունում նրանց ընդգրկվածությունը երկու տարի ժամկետով: Տարօրինակ է այն երկրների դիրքորոշումը, որոնք կողմ քվեարկեցին, երբ ՄԱԿ-ի կանոնադրության համաձայն՝ Անվտանգության խորհրդում ոչ մշտական անդամի կարգավիճակ կարող են ստանալ այն երկրները, որոնք իրենց նպաստն են բերել միջազգային անվտանգությանը և խաղաղությանը: Այնինչ, իմ դիտարկմամբ, ավելի ռազմատենչ, ավելի ագրեսիվ ՄԱԿ-ի անդամ երկիր, քան Ադրբեջանն է՝ չկա: Մեր տարծաշրջանում այն եզակի է և՛ իր ռազմամոլությամբ, և՛ իր ագրեսիվ հեռտորաբանությամբ:
Այն երկրները, ովքեր որ կողմ են քվեարկել, ես կուզենայի բերեին իրենց փաստարկները, թե ինչով է կոնկրետ Ադրբեջանը համապատասխանում ՄԱԿ-ի կանոնադրության այն հոդվածին, որի համաձայն երկու տարի ժամկետով ընտրվել է ոչ մշտական անդամ: Ի՞նչ կերպ է, ասենք, Ադրբեջանը իր մասնակցությունը բերել համաշխարհային խաղաղությանն ու անվտանգությանը: Մի երկիր, որը վերջին ինը տարիների ընթացքում 500 տոկոսով բարձրացրել է իր ռազմական բյուջեն: Սա ինձ համար իսկապես անհասկանալի է, և ես կուզեի, որ ՄԱԿ-ում մեր ներկայացուցիչները շատ ավելի ակտիվ լինեին իրենց լոբբիստական գործունեության մեջ»:
