Anonymous ցանցահենների խումբը, որը հայտնի է կառավարությունների և խոշոր կորպորացիաների դեմ հաքերային հարձակումներով, սկսել է պայքարել համացանցում մանկական պոռնոգրաֆիայի տարածման դեմ: Այս մասին գրում է բրիտանական The Telegraph պարբերականը` վկայակոչելով ցանցահենների հայտարարությունը:
Ցանցահեններն իրենց վրա են վերցրել մանկական պոռնոգրաֆիա տարածող ավելի քան 60 կայքերի արգելափակման պատասխանատվությունը: «Դրանց թվում է Lolita City-ն, որում տեղադրված է ավելի քան 100 գիգաբայթ մանկական պոռնոգրաֆիա»,- հայտարարել են նրանք: Կայքերը կոտրելուց հետո ցանցահենները հրապարակել են դրանց ավելի քան 1500 այցելուների օնլայն տվյալները:
Պարզելով, թե որ ընկերությունն է կայքին հոստինգի ծառայություններ տրամադրել՝ ցանցահենները պահանջել են նրա ղեկավարությունից ջնջել մանկական պոռնոգրաֆիա պարունակող բոլոր նյութերը և հրաժարվել այդպիսի նյութեր տարածող կայքերին աջակցելուց: Մերժում ստանալուց հետո ցանցահենները փրովայդերին մեղադրել են գիտակցաբար մանկական պոռնոգրաֆիա տարածելու մեջ և, կոտրելով նրա համակարգը, արգելափակել նյութերի մի մասը:
Lolita City-ի և հոսթինգ-փրովայդերի սեփականատերերը հրաժարվել են որևէ մեկնաբանություն տալ:
Չնայած ցանցահենների բարի մտադրություններին՝ նրանց գործողությունները քննադատության տեղիք են տվել: Փորձագետները կարծում են, որ անօրինական կայքերը կարող են փակվել միայն իշխանությունների կողմից, իսկ ցանցահենների գործողությունները կարող են խանգարել ոստիկանական հետաքննություններին: