Սերժ Սարգսյանը երեկ Մոսկվայում պարգևատրել է հայ և ռուս մի շարք մտավորականների, տարբեր բնագավառների գործիչների: Այդ պարգևատրությունների շարքում կա ուշագրավ մեկը: Սերժ Սարգսյանը «Անանիա Շիրակացի» մեդալով է պարգևատրել Միջպետական ավիացիոն կոմիտեի ղեկավար Տատյանա Անոդինային:
Այստեղ ուշագրավն այն է, որ Անոդինայի գլխավորած ՄԱԿ-ն էր հետաքննում 2006 թվականի մայիսի 3-ին Սոչիում աղետի ենթարկված «Արմավիա» ընկերության «Ա-320» օդանավի աղետը, որի վերջում եզրակացություն հրապարակվեց, համաձայն որի աղետի պատճառ համարվեց մարդկային գործոնը, այսինքն` օդաչուների սխալը:
Սերժ Սարգսյանն այդ ժամանակ Հայաստանի Հանրապետության պաշտպանության նախարարն էր և հայ-ռուսական միջկառավարական հանձնաժողովի համանախագահը: Սերժ Սարգսյանը` հայկական կողմից և այդ հանձնաժողովի ռուսաստանցի համանախագահ, Ռուսաստանի տրանսպորտի նախարար Իգոր Լևիտինն էլ` ռուսական կողմից Սոչիում զբաղվում էին աղետի հետևանքների վերացման կազմակերպական աշխատանքներով, ղեկավարում այդ աշխատանքները:
Հիշեցնենք նաև, որ աղետի ենթարկված այդ հայկական օդանավում էին բավական հայտնի մարդիկ` նախկին ԽՍՀՄ պաշտոնյաներ, որոնք մի որոշ ժամանակահատված պաշտոններ էին զբաղեցրել նաև անկախ Հայաստանում. օրինակ` ՀԽՍՀ ներքին գործերի նախարար և անկախ Հայաստանում էլ որոշ ժամանակ ՊԱԿ ղեկավար աշխատած Հուսիկ Հարությունյանը: Բացի այդ կարգի մարդկանցից, օդանավում էին եղել նաև ռուսաստանահայ քրեական հեղինակություններ:
Օդանավի աղետի շուրջ Հայաստանում բավական երկար ժամանակ տարբեր վարկածներ էին շրջանառվում, մինչև անգամ օդանավի սրահում իբր տեղի ունեցած «ռազբորկաների» մասին, նաև այն մասին, որ օդանավով Ռուսաստան էին գնում քրեական հեղինակություններ, որոնք Հայաստան էին ժամանել ինչ-ինչ ֆինանսական խնդիրներ լուծելու համար: Իհարկե այդ բոլոր վարկածներն էլ մնացին լոկ վարկածի մակարդակի, իսկ կատարվածի հետաքննության պաշտոնական եզրակացությունը տվեց Տատյանա Անոդինայի ղեկավարած միջպետական ավիացիոն կոմիտեն, ասելով, որ օդանավն աղետի է ենթարկվել մարդկային գործոնի` օդաչուական սխալի հետևանքով:
Աղետից մոտ 5 տարի անց Սերժ Սարգսյանը պարգևատրեց Տատյանա Անոդինային: