Great Wall Society կազմակերպության ակտիվիստներն ահազանգում են, որ Չինական մեծ պատը տասնյակ օրինական և անօրինական հանքավայրերի պատճառով գտնվում է փլուզման եզրին:
Ինչպես հայտնում է Reuters գործակալությունը, Պեկինից 200 կիլոմետր հարավ` Հեբեյ մարզում, պղնձի, երկաթի և նիկելի տասնյակ հանքավայրեր սպառնում են բազմադարյա հզոր պատի գոյությանը: Որոշ հանքավայրեր գտնվում են պատից 100 մետրից պակաս հեռավորության վրա:
Great Wall Society-ի փոխնախագահ Դոնգ Յահուին հայտնել է, որ այդ հանքավայրերից շատերը օրինական են, ուստի իրենք ոչինչ չեն կարող անել:
Մշակութային ժառանգության պահպանման դեպարտամենտը ամեն տարի միջոցներ է հատկացնում պատի վնասված մասերի վերականգնման համար, սակայն, ըստ Դոնգի, դա չի կանխում փլուզումը: Այս պահին պատի ավելի քան 70%-ը վնասված է և միայն 20%-ն է գտնվում լավ վիճակում:
Չինական պատն ունի ավելի քան 2000 տարվա պատմություն: Նրա մի մասը կառուցվել է Ք.ծ. առաջ 3-րդ դարում` Ցին դինաստիայի կառավարման տարիներին` Չինաստանի հյուսիսային մասերում ապրող քոչվորներից պաշտպանվելու համար: Պատն ամբողջությամբ կառուցվել է Մին դինաստիայի կառավարման տարիներին (14-17-րդ դարեր):
Չինական մեծ պատը միակ ձեռակերտ օբյեկտն է, որը տեսանելի է տիեզերքից: 1987 թվականից այն գտնվում է ՅՈՒՆԵՍԿՕ-ի պաշտպանության ներքո:
