Եմենի նախագահ Ալի Աբդալլահ Սալեհը ողջունել է ՄԱԿ-ի Անվտանգության խորհրդի` երկրում իշխանությունը հանձնելու բանաձևը: Այս մասին հաղորդում է Reuters գործակալությունը` վկայակոչելով տեղի պաշտոնական ԶԼՄ-ները:
ՄԱԿ-ի հոկտեմբերի 21-ի բանաձևը նախատեսում է Ծոցի արաբական երկրների համաձայնության խորհրդի (ԾԱԵՀԽ) նախաձեռնությամբ պայմանավորվածություն ձեռք բերել Եմենի նախագահ Ալի Աբդալլահ Սալեհի հետ` իշխանությունը հանձնելու ուղղությամբ:
Եմենյան SABA գործակալության տարածած հաղորդագրության մեջ ասվում է, որ նախագահը «պատրաստակամություն է հայտնել բանակցությունների սեղանի շուրջ նստել ընդդիմության ներկայացուցիչների հետ և հնարավորինս շուտ ստորագրել ԾԱԵՀԽ նախաձեռնությունը և անցկացնել արտահերթ ընտրություններ»:
Ավելի վաղ Եմենի նախագահը երեք անգամ պատրաստակամություն էր հայտնել հանձնել իշխանությունը, սակայն վերջին պահին հրաժարվել էր:
Ալի Աբդալլահ Սալեհը Եմենում կառավարում է 1978թ.-ից: 2011թ. հունվարից երկրում անընդհատ տեղի են ունենում բողոքի ցույցեր, որոնց մասնակիցները պահանջում են նախագահի անհապաղ հրաժարականը:
