Այսօր տեղի ունեցավ «Համակարգիչ բոլորի համար» ծրագրի հիմնական փուլի մեկնարկին նվիրված միջոցառումը, որին մասնակցում էին ՀՀ վարչապետ Տիգրան Սարգսյանը, էկոնոմիկայի և կրթության ու գիտության նախարարները, տեղեկատվական տեխնոլոգիաների ոլորտի մի շարք ընկերությունների ու բանկերի ներկայացուցիչներ: Ծրագրին օժանդակում են «Ինտել» կորպորացիան, «Հյուլեթ-Պակարդ» ընկերությունը, «Մայքրոսոֆտ Ար Էյ» ընկերությունը, ԱՄՆ Միջազգային զարգացման գործակալության «ՔԱՓՍ» ծրագիրը, Համաշխարհային բանկը, «ԱրմենՏելը» և այլ ընկերություններ: «Այս ծրագիրը համարվում է կառավարության կարևորագույն ծրագրերից մեկը 2010 թ. համար: Ծրագիր, որը համախմբում է միջազգային հեղինակավոր կազմակերպություններին, ծրագիր, որն ստիպում է մեր բոլոր գերատեսչություններին համախմբվել` ներկայացնելու այս ծրագրի գաղափարախոսությունը: Այս ծրագիրը հնարավորություն է տալու, որ մեր քաղաքացիների համար համակարգիչը լինի հասանելի»,- իր ողջույնի խոսքում նշեց վարչապետ Տիգրան Սարգսյանը:
