Հայ ազգային կոնգրեսի կենտրոնական շտաբի ներկայացուցիչները երեկ այցելել են Մարտունի քաղաք, որտեղ հանդիպել են Կոնգրեսի Մարտունու տարածքային կառույցի ներկայացուցիչների և ակտիվիստների հետ: Հանդիպմանը, որն անցել է բավականին բուռն, մասնակցել են մոտ 60 մարտունեցիներ: Կոնգրեսի ներկայացուցիչները պատասխանել են մարտունեցիների հարցերին, ներկայացրել են Հայաստանում տիրող ներքաղաքական իրավիճակը, խոսել Աստանայում կայացած ԵԱՀԿ գագաթնաժողովից: Ի պատասխան՝ մարտունեցիներն էլ ասել են, որ իրենք սպասում և պատրաստ են իշխանափոխության, ընդ որում` բացառապես արտահերթ ընտրությունների միջոցով: Ավելին՝ հանդիպմանը ներկա մարտունեցի տարեցներից մեկն ասել է, որ իշխանափոխություն անելուն սպասում են ոչ միայն երիտասարդները, այլ նաև մեծահասակները: Ու որպես իր խոսքերի ապացույց՝ մարտունեցին ասել է, թե ի տարբերություն երիտասարդների` իրենք շորերով են անկողին մտնում, որպեսզի անհրաժեշտության դեպքում անմիջապես անցնեն իշխանափոխության գործին: «Պայքար, պայքար չուրի վերջ»,- հավելել է մարտունեցի ծերունին: Մշո բարբառով «չուրի» նշանակում է` «մինչև»: