Այսօրվանից մեկնարկում է գործարար պատգամավոր Գագիկ Ծառուկյանի բարեգործական հիմնադրամի մշակույթի աջակցման նորաստեղծ խորհրդի գործունեությունը: Այսօր կայացած մամուլի ասուլիսի ժամանակ այդ մասին հայտարարեց խորհրդի նախագահ, կոմպոզիտորների միության նախագահ Ռոբերտ Ամիրխանյանը` հավելելով, որ նախագծի իրականացման համար Գագիկ Ծառուկյան բարեգործական հիմնադրամը տրամադրել է 100 միլիոն դրամ:
Ռոբերտ Ամիրխանյանի խոսքով՝ խորհուրդը ձևավորվել է ՀՀ հեղինակավոր մշակութային գործիչների առաջարկով: Կազմում ընդգրկված են մշակույթի ոլորտում մեծ ավանդ ունեցող արվեստագետներ, ինչպես օրինակ՝ Ջիվան Գասպարյան, Ժիրայր Ալթունյան, Արամ Իսաբեկյան և այլոք:
«Մեր երկրում մշակութային գործոնը պետք է ակտիվացնել և տեր կանգնել ստեղծագործական հայտեր ներկայացնող անձին և նրա առաջրկներին: Խորհուրդը կգործի Կոմպոզիտորների միության տարածքում, բացի արվեստագետներից դրանում ընդգրկված կլինեն առանձին փորձագետներ, ովքեր կգնահատեն առաջարկվող նախագծերի ֆինանասական կողմը»,-նշեց կոմպոզիտորը:
«Բոլոր հայտերը կանցնեն խստագույն քննություն, քանի որ խորհուրդը բաղկացած է պրոֆեսիոնալներից և կգործի ամենաբարձր մակարդակով»,- նշեց Խորհդի քարտուղար էրիկ Բարսեղյանը:
Ռոբերտ Ամիրխանյանը նաև նկատեց, որ խորհրդի ստեղծումը ուղղակիորեն նշանակում է, որ մշակույթի նախարարությունը լավ չի աշխատում: «Այսօր մշակույթի նախարարության բյուջեն ամենաբարձրերից է, բայց բավական թվով լրջագույն ծրագրեր մնում են նրա կողմից չիրականացված»:
Ամփոփելով՝ նորաստեղծ խորհրդի նախագահը նշեց, որ խորհրդի մասին խոսելով ինքը խոսում է մի մանուկի մասին, որը նոր-նոր է ուզում ծնվել և առողջ ապրել:
