Ռուսական Regnum լրատվական գործակալությանը տված հարցազրույցում Կալիֆոռնիայի Բերկլիի համալսարանի պրոֆեսոր Սիթիվեն Ֆիշեմն անդրադարձել է ղարաբաղյան հակամարտության կարգավորմանը.
«Ոչ վաղ անցյալում Ռուսաստանի վարչապետ Վլադիմիր Պուտինը ներկայացրեց Եվրասիական միության գաղափարը։ Դրա իրագործումը կախված է նրանից, թե որքանով են մյուս երկրները, որոնց նա մտադիր է ընդգրկել միությունում, պատրաստ դրան։ Մյուս կողմից էլ Ռուսաստանն արդեն իսկ շատ սերտորեն համագործակցում է Կենտրոնական Ասիայի երկրների հետ։ Հաշվի առնելով այս ամենը՝ կարելի է ասել, որ այդ միությունը կարող է փոխշահավետ լինել։
Հայաստանի հետ արդեն իսկ գոյություն ունի նմանատիպ միություն։ Հայաստանը փաստացիորեն հանդիսանում է ռուսական անվտանգության համակարգի մասը և հայ-թուրքական սահմանին կանգնած են ռուսական սահմանապահ զորքերը։ Բացի այդ, Ռուսաստանը մեծ ազդեցություն ունի Հայաստանի տնտեսության վրա։
Բացի Հայաստանից, Ռուսաստանը տարածաշրջանում բավական սերտ կապեր ունի նաև Ադրբեջանի հետ։ Ռուսաստանը կարող է դառնալ խաղաղության երաշխավոր և թույլ չտալ ղարաբաղյան հակամարտության գոտում ռազմական գործողությունների վերսկսումը, ինչն ավելի կարևոր է տարածաշրջանում ամերիկյան ցանկացած նախաձեռնությունից։ Այլ կերպ ասած՝ այդ միությունը կարող է երաշխիքի դեր խաղալ Հայաստանի ու Ադրբեջանի համար՝ ռազմական գործողությունների վերսկսումը կանխելու և այդ միության ներսում հակամարտությունը կարգավորելու պլանում։ Չէ՞ որ միության ներսում այդ հակամարտության կարգավորումն ավելի հեշտ կլինի։
Վրաստանն ընդհանրապես այլ թեմա է, քանի որ վրացական ազգայնականությունն ունի այնպիսի հակառուսական տրամադրվածություն, որ անհնար է այդ թեման քննարկել Վրաստանի հետ»։
