Ադրբեջանական APA լրատվական գործակալության փոխանցմամբ՝ Ռուսաստանի, Եվրասիայի և միջազգային էներգետիկ քաղաքականության հարցերով Heritage («Ժառանգություն») հիմնադրամի առաջատար փորձագետ, ԱՄՆ պետդեպարտամենտի նախկին խորհրդական Արիել Քոհենն անդրադարձել է ՄԱԿ ԱԽ ժամանակավոր անդամ դառնալու՝ Ադրբեջանի ներկայացրած հայտին, որի ճակատագիրը վճռվելու է այսօր ՄԱԿ ԳԱ-ում.
«ՄԱԿ ԱԽ ժամանակավոր անդամ դառնալու համար պետք է բարդ դիվանագիտական քայլեր կատարել։ Քանի որ ԵՄ-ի շատ երկրներ արդեն իսկ ներկայացված են եղել այստեղ, ուստիև Ադրբեջանն ավելի մեծ հնարավորություններ ունի, քան՝ Հունգարիան։
Դրա հետ մեկտեղ, Ռուսաստանը և այլ հետխորհրդային երկրներ, ինչպես նաև Իսլամական համագործակցության կազմակերպության (ԻՀԿ) անդամ երկրների (57) մեծամասնությունը կաջակցի Ադրբեջանին»։
Հիշեցնենք, որ երեկ ադրբեջանական Turan լրատվական գործակալությունը մեջբերել էր մի շարք ամերիկյան վերլուծաբանների կարծիքները՝ ՄԱԿ ԱԽ ժամանակավոր անդամ դառնալու Ադրբեջանի հնարավորությունների վերաբերյալ։ Նրանք թերահավատորեն էին մոտեցել Ադրբեջանի հնարավորություններին՝ դրանք գնահատելով 25 տոկոս։
