Ադրրբեջանական ANS PRESS-ի փոխանցմամբ՝ Ալմա Աթիում ավարտվել է Թյուրքալեզու երկրների համագործակցության խորհրդի նիստը, որի արդյունքում ընդունվել է 49 կետից բաղկացած փաստաթուղթ: Փաստաթղթի տակ իրենց ստորագրությունն են դրել Ղազախստանի նախագահ Նուրսուլթան Նազարբաևը, Ադրբեջանի նախագահ Իլհամ Ալիևը, Ղրղզստանի նախագահ Ռոզա Օթունբաևան, Թուրքիայի փոխվարչապետ Բեքիր Բոզդաղը։
Կողմերը պայմանավորվել են, որ Թյուրքալեզու երկրների համագործակցության խորհրդի երկրորդ նիստն անցկացվելու է 2012 թվականին, Ղրղզստանում։ Այն նվիրված է լինելու կրթական, գիտական ու մշակութային ոլորտներում թյուրքալեզու երկրների համագործակցությանը։
Ալմա Աթիում թյուրքալեզու երկրները քննարկել են համաշխարհային տնտեսական ճգնաժամին դիմակայելու, ինչպես նաև առևտրա-տնտեսական կապերի զարգացման ու թյուրքալեզու երկրների տարանցիկ ու ներդրումային պոտենցիալի հարցերը։
Հիշեցնենք, որ Թյուրքալեզու երկրների համագործակցության խորհուրդը ստեղծվել է 2009 թվականին` թյուրքալեզու երկրների միջև բազմակողմ համագործակցության ծրագրեր առաջ քաշելու ու խթանման համար: Հիմնադիր անդամներն են Ադրբեջանը, Ղազախստանը, Ղրղզստանն ու Թուրքիան: Խորհրդի գլխավոր քարտուղարությունը գտնվում է Ստամբուլում:
