Ֆրանսիայի նախագահ Նիկոլա Սարկոզին հայտարարել է, որ եվրոգոտու` ճգնաժամից դուրս գալու շուրջ բանակցությունները փակուղի են մտել՝ Ֆրանսիայի և Գերմանիայի միջև տարաձայնությունների պատճառով:
ԻՆչպես հաղորդում է Reuters գործակալությունը, երեկ Սարկոզին մեկնել է Ֆրանկֆուրտ` Գերմանիայի կանցլեր Անգելա Մերկելի հետ անձամբ խոսելու և կիրակի օրը նախատեսվող գագաթնաժողովից առաջ փակուղուց դուրս գալու ելքեր որոնելու համար:
Հանդիպումից հետո Մերկելը և Սարկոզին լրագրողներին որևէ մեկնաբանություն չեն տվել: Այն հարցին, թե արդյոք որևէ բան որոշվե՞լ է, Եվրախմբի նախագահ Ժան Կլոդ Յունկերը, ով ներկա է եղել հանդիպմանը, պատասխանել է. «Մենք նախկինի պես սպասում ենք շաբաթ և կիրակի օրերին նախատեսվող հանդիպումներին»:
Ֆրանսիան կարծում է, որ Ֆինանսական կայունության եվրոպական հիմնադրամը (EFSF) փրկելու համար անհրաժեշտ է այն վերածել բանկի, որպեսզի այն կարողանա ֆինանսավորում ստանալ Եվրոպական կենտրոնական բանկից: ԵԿԲ-ն և Գերմանիան դեմ են Ֆրանսիայի այս առաջարկին:
