Պայքար ներկայումս կա ոչ միայն ՀՀԿ-ի և ԲՀԿ-ի, այլ նաև քաղաքական մյուս ուժերի միջև: Այսօր կայացած մամուլի ասուլիսի ժամանակ այս մասին հայտարարեց քաղաքական և ընտրական տեխնոլոգիաների փորձագետ Արմեն Բադալյանը:
Անդրադառնալով հատկապես Հանրապետական և «Բարգավաճ Հայաստան» կուսակցությունների շուրջ եղած խոսակցություններին՝ նա նկատեց, որ կոալիցիոն երկու ուժերի միջև հակասությունների մասին տեղեկատվությունը և դրա տարածման ժամանակը լավ էին մտածված:
«Հնարավոր է՝ այս լուրերը տարածվեցին ընդդիմադիր ուժերի կողմից` սեփական դիրքերը ամրապնդելու համար, գուցե դա արեց հենց ԲՀԿ-ն, ով ցանկանում է ասել` տեսե՛ք, ինձ վերջնագրեր են ներկայացնում, բայց ես ուժեղ եմ և դրանց չեմ տրվում»,- ասաց Բադալյանը:
Կառավարման փորձագետ Հարություն Մեսրոպյանն իր հերթին նկատեց, որ ինտրիգ այս ամենում չկա: «Ընդամենը տարատեսակ նպատակներով ուզում են հետաքրքրություն ստեղծել: Բայց այս քսան տարիների ընթացքում մենք հասկացանք, որ Հայաստանում իրական ընդդիմություն չկա: Այն ուժերը, որոնք այսօր կուրծք են ծեծում, ընտրություններից հետո, ամենայն հավանականությամբ, կմտնեն կոալիցիայի մեջ: Հայաստանում բոլոր հաջորդ իշխանությունները նախորդների շարունակությունն են»,- համոզմունք հայտնեց Մեսրոպյանը` հավելելով, որ մեր երկրում չկան քաղաքական ուժեր, կան միայն առանձին անձեր:
Արմեն Բադալյանը, խոսելով կոալիցիայի անդամ ՕԵԿ-ի մասին, նկատեց, որ Արթուր Բաղդասարյանը 2008 թվականի մարտի 1-ի կրիտիկական իրավիճակից հետո «կոտրել» է կուսակցության կերպարը, և ինչ էլ անի, այդ քաղաքական ուժն այլևս գոյություն չունեցող միավոր է և ընտրություններին շատ քիչ քվեներ կստանա: «ՕԵԿ-ն այլևս մահացած ուժ է: Ինչ վերաբերում է ԲՀԿ-ին չեզոքացնելուն, ապա դա պետք է արվեր ոչ թե ընտրություններից վեց ամիս, այլ առնվազն մեկ տարի առաջ»,-նկատեց նա:
Մեսրոպյանի խոսքերով՝ հաջորդ տարի կայանալիք խորհրդարանական ընտրություններից հետո Հայաստանում ոչինչ չի փոխվի, իսկ քաղաքական դաշտի ներկայիս զարգացումները ոչ այլ ինչ են, եթե ոչ աթոռներ զբաղեցնելու պայքար:
