Մայր աթոռ սուրբ Էջմիածնից «Առաջին լրատվականին» տեղեկացնում են, որ հոկտեմբերի 19-ին Մայր աթոռ սուրբ Էջմիածնում Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունել է Մոսկվայի հոգևոր ակադեմիայի ռեկտոր, Մոսկվայի թեմի առաջնորդական փոխանորդ Վերեյսկի արքեպիսկոպոս Եվգենիին:
Նորին սրբությունը հանդիպմանն իր բարեմաղթանքներն ու օրհնությունն է բերել սրբազանին` ընդգծելով, որ քույր եկեղեցիների ներկայացուցիչների նման այցելությունները հարմար առիթ են մոտիկից ծանոթանալու Հայաստանյայց առաքելական եկեղեցուն և մեր հավատավոր ժողովրդին, դարերի հոլովույթում նրա կերտած ազգային-հոգևոր արժեքներին:
Զրույցի ընթացքում կարևորվել են երկու եկեղեցիների միջև առկա ջերմ և եղբայրական հարաբերությունները, մասնավորապես հոգևոր-կրթական հաստատությունների միջև ձևավորված համագործակցությունը:
Վեհափառ հայրապետը գոհունակությամբ անդրադարձել է Գևորգյան հոգևոր ճեմարանի և Սանկտ Պետերբուրգի հոգևոր ակադեմիայի միջև ստորագրված համագործակցության հուշագրին:
Նորին Սրբությունն անդրադարձել է նաև Հայոց եկեղեցու առաջնահերթ խնդիրներից մեկին` հոգևորականների պատրաստությանը:
Տեղեկացնելով, որ իր գահակալության տարիներին շուրջ երեք հարյուր եկեղեցականներ են ձեռնադրվել և ծառայության կոչվել, Ամենայն հայոց կաթողիկոսը նկատել է, որ դեռ բազում անելիքներ կան այդ ոլորտում` հույս հայտնելով, որ Հայստանում գործող երեք կրթական հաստատությունները` Գևորգյան հոգևոր ճեմարանը, Սևանի Վազգենյան դպրանոցը և Հառիճավանքի ընծայարանը պիտի լրացնեն եկեղեցականների պակասը:
Իր հերթին Վերեյսկի արքեպիսկոպոս Եվգենին երախտագիտություն է հայտնել ընդունելության համար:
Հանդիպմանը ներկա են եղել Մայր աթոռի միջեկեղեցական հարաբերությունների գրասենյակի պատասխանատու Տ. Հովակիմ եպիսկոպոս Մանուկյանը, Գևորգյան Հոգևոր Ճեմարանի տեսուչ Տ. Գևորգ վարդապետ Սարոյանը և Մոսկվայի հոգևոր ակադեմիայի շրջանավարտ, Մայր Աթոռի Վարչա-տնտեսական բաժնի տնօրեն Տ. Մուշեղ վարդապետ Բաբայանը:
