«2012 թ. բյուջեն ամբիցիաներ չի պարունակում: Հերթական բյուջեն են կազմել` ներկայացնելու համար»,- այսօր ասուլիսում հայտարարեց ՀԱԿ ներկայացուցիչ, տնտեսագետ Վահագն Խաչատրյանը` նշելով որ այս բյուջեի առանձնահատկությունը հարկային եկամուտների 101 մլրդ դրամի ավելացումն է, որը, կարծես թե, լավ է և կնպաստի կյանքի բարելավմանը, բայց իրականում, ըստ նրա՝ սա շատ վտանգավոր նախաձեռնություն է, որ ցուցաբերում է կառավարությունը. «Կառավարությունն այն ծայրից չի սկսել իր գործունեությունը, չի գնահատել տնտեսության պոտենցիալը»:
Վ. Խաչատրյանի խոսքով՝ ստվերը 50-60% է կազմում, և հարկային հավելյալ մուտքերն ապահովելու համար քաղաքական որոշում է հարկավոր, իսկ դրա համար պետք է «Սերժ Սարգսյանը հավաքի օլիգարխներին և ասի, որ վերջ, աշխատում ենք ինվոյսներով»: Ըստ տնտեսագետի՝ առաջանում է լուրջ խնդիր` ում հաշվին պետք է դա արվի` ՓՄՁ-ների՞, որոնք կրկին ենթարկվելու են ճնշումների:
Բանախոսը նշեց, որ մշակվող հարկային փաթեթում առաջին հարվածը հասցվում է բարձր աշխատավարձ ունեցողներին, ավելանում է եկամտահարկը. մինչև 500 հզ. դրամ աշխատավարձի դեպքում՝ 20%, 500-ից ավելիի` 25%, 1 մլնից ավելիի` 30%: Ակցիզային հարկերը պետք է ավելացվեն, ինչը, ըստ Վ. Խաչատրյանի, քաղաքացիներից է գնալու. «Եթե հարկային բեռն ավելանում է, դա ավելանում է նաև մեզ համար` սովորական քաղաքացիներիս»:
Վ.Խաչատրյանի գնահատականով՝ եթե փորձեն այս բյուջեն կատարել, դա շատ լուրջ բացասական ազդեցություն կունենա բիզնեսի վրա: Նախագծով նախատեսվում է 1.5 մլրդ հատկացնել բիզնեսի զարգացմանը, սակայն ավելի լավ կլիներ բիզնեսը թողնել ազատ, որը ինքն իրեն ավելի լավ կզարգանա:
Տնտեսագետը նաև նշեց, որ իշխանությունը տարիներ շարունակ, հատկապես 2008-ից սկսած, ներկայացնում էր տեսլական, որ արտահանմանը միտված քաղաքականություն պետք է վարի. «Կորցրել ենք շուկաներ, հիմա փորձում են վերակագնել: Օրինակ՝ ադամանդի արտադրանքով ՀՀ-ն հայտնի էր աշխարհում, բայց դրամի արժևորման արդյունքում կորցրեցինք դա»: Արտահանմանը միտված քաղաքականությանը, բանախոսի կարծիքով, չի նպաստում ՀՀ-ում վարվող քաղաքականությունը` լուծված չէ մրցակցության խնդիրը: Միջազգային կառույցների զեկույցներում միշտ նշվում է ՀՀ-ում կոռուպցիայի բարձր տոկոսը, ստվերային տնտեսությունը, մրցակցության բացակայությունը, օլիգարխիկ տնտեսությունը:
Վ. Խաչատրյանը նկատեց, որ իշխանությունները միշտ ցույց են տալիս տարբեր վարկանիշների դրական կողմերը` մոռանալով բացասականը. Ֆորբսի՝ «Լավագույն երկրները բիզնեսով զբաղվելու համար» վարկանիշում ՀՀ-ում ձեռնարկութուն գրանցելը «լավ» է գնահատվել, բայց կոռուպցիայի մասով վերջին 30 երկրների շարքում ենք, այդտեղ են նաև ՌԴ-ն և Ադրբեջանը: Հարկային բեռով 117 տեղում ենք, անձնական ազատության խնդրով` 100-րդ, առևտրի ազատությամբ` 41-րդ տեղում ենք, այն դեպքում, երբ Վրաստանը 6-րդ տեղում է:
