«Ղարաբաղյան հակամարտության կարգավորման գործընթացում էական ոչինչ տեղի չի ունենում և այս պահին չի կարող տեղի ունենալ»,- այսօր կայացած մամուլի ասուլիսի ժամանակ հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ առավել գլոբալ մակարդակով աշխարհում ևս նոր ոչինչ տեղի չի ունենում: «Այնպես որ, էական իրադարձությունների ես չեմ սպասում»,- նկատեց քաղաքագետը:
Անդրադառնալով ղարաբաղա-ադրբեջանական շփման գծում Ադրբեջանի կողմից կառուցվող պաշտպանական պատին` Իսկանդարյանը հռետորական հարց հնչեցրեց. «Պատը կառուցում են, որ հետո էլ հարձակվե՞ն, թե՞ քանդեն այն»: Շարունակելով` Կովկասի ինստիտուտի տնօրենը կասկած հայտնեց, որ ԵԱՀԿ Մինսկի խմբում Ֆրանսիան երբևէ կկարողանա զբաղեցնել Ռուսաստանի տեղը:
Կովկասի ինստիտուտի ղեկավարի դիտարկումներով՝ Հայաստանում քաղաքական ուժերի, այդ թվում` կոալիցիոն կուսակցությունների մեջ նորմալ նախընտրական պայքար է սկսվել, միաժամանակ պայքարն, ընտրություններին մոտենալով, ավելի է սրվելու: «Քաղաքական պայքարը նոր, թեժ բան չէ: Պարզապես ակնհայտ է, որ ՀՀԿ-ն փորձելու է հասնել «50+1»-ի: Ինչ վերաբերում է ԲՀԿ-ի` կոալիցիայից դուրս գալուն, կարծում եմ՝ այս պահին դա նրա համար ձեռնտու չէ: Այդ դեպքում նա բավական թվով գործիքներ կկորցնի և ստիպված կլինի որոշակի արդյունքների հասնել հանրահավաքների և այլ գործողությունների արդյունքում: Պարզ է, որ կոալիցիայի ներսում խնդիրներ կան: ԲՀԿ-ն, որի շուրջ այսպիսի ինտրիգ է ծավալվել, ցանկանում է ապագա խորհրդարանում շատ թվով տեղեր ունենալ, և, խնդրելուց բացի, հաճախ ստիպված է լինում սպառնալ: Միաժամանակ, այդ կուսակցությունը դժվար թե կարողանա ավելի շատ ձայներ հավաքել, քան ՀՀԿ-ն»,- նկատեց Իսկանդարյանը:
Քաղաքագետն անհավանական համարեց, որ ԲՀԿ-ն կարող է ինչ-որ պահի միանալ ՀԱԿ-ին. «Ես, օրինակ, չեմ պատկերացնում, որ Լևոն Տեր-Պետրոսյանը ցանկանա խորհրդարանում երկրորդը լինել Գագիկ Ծառուկյանից հետո»:
