Грузия Online-ի փոխանցմամբ՝ վրացի միլիարդատեր Բիձինա Իվանիշվիլին «Ռոյթերս» գործակալությանը տված հարցազրույցում 90 տոկոսով վստահություն է հայտնել, որ իր ղեկավարած քաղաքական ուժը բացարձակ մեծամասնություն կստանա 2012 թվականին Վրաստանում կայանալիք խորհրդարանական ընտրություններում.
«Դեռևս հայտնի չէ, թե արդյոք մենք կստեղծե՞նք ընդդիմադիր քաղաքական դաշինք, թե՞ դա կլինի մեկ կուսակցություն։ Ներկայումս մենք խորհրդակցություններ ենք անցկացնում ընդդիմադիր քաղաքական առողջ ուժերի հետ։ Ես ձեզ կարող եմ 90 տոկոսով հավաստիացնել, որ մենք բացարձակ մեծամասնությամբ մտնելու ենք խորհրդարան։
Ես տատանվում էի մինչև վերջ, սակայն այժմ կարծում եմ, որ իմ դիրքերն ամրապնդվում են օրեցօր, իսկ նրանց (իշխանությունների) դիրքերը սասանվելու են։ Ես վաճառելու եմ Ռուսաստանում ունեցած ակտիվներս, որպեսզի դրանք ներդնեմ Վրաստանի տնտեսության մեջ։
Արդեն մեկնարկել է Ռուսաստանում իմ ունեցվածքի գնահատման գործընթացը։ Ես գիտակցում եմ, որ ինձ չի հաջողվի դրանք վաճառել իրենց առավելագույն գնով, սակայն ես պատրաստ եմ վաճառել ամբողջը»։
Հիշեցնենք, որ ավելի վաղ նշվում էր, թե Իվանիշվիլին սեփական կուսակցության ստեղծումից բացի, պետք է համագործակցի նաև ազատ դեմոկրատների ու հանրապետականների հետ։
