Հանրային հեռուստաընկերությունը «Մանկական Եվրատեսիլ-2011»-ի տոմսերը պատվիրել է դրսում: Ըստ նախնակաան տեղեկությունների` դրանք վաճառքում կլինեն հոկտեմբերի 20-ից: «Առաջին լրատվականի» հետ զրույցում այս մասին հայտնեց «Մանկական Եվրատեսիլի» կազմկոմիտերի մամուլի ղեկավար Արտակ Վարդանյանը:
Նրա խոսքով`բավական օր մնում է` մոտ մեկ ամիս, ինչը բավարար է, որ մարդիկ հանգիստ կարողանան ձեռք բերել տոմսերը: «Իսկ թե ինչ կարժենան տոմսերը, դեռ հայտնի չէ: Ներկայում ընթանում են վերջին ճշգրտումները, և մենք միայն դրանից հետո պաշտոնապես կհրապարակենք դրանք»,- տեղեկացրեց Ա.Վարդանյանը` ընդգծելով, որ գուցե արդեն վաղը հայտնի լինեն տոմսերի արժեքները:
Նրա խոսքով`մամուլում ինչ-որ թվեր են շրջանառվում, բայց իրականում մինչև տոմսերն այստեղ չգան-չհասնեն, մինչև քննարկումները չավարտվեն, տոմսերի արժեքի մասին ոչինչ չի կարող հայտնել:
Տեղեկացնենք, որ «Եվրատեսիլ-2010» մրցույթում Հայաստանը ներկայացրած Վլադիմիր Արզումանյանը գրավեց առաջին տեղը «Մայրիկ» երգով:
«Եվրատեսիլ-2011»-ը կանցկացվի դեկտեմբերի 3-ին Երևանի Կարեն Դեմիրճյանի անվան մարզամշակութային համալիրում:
Հայաստանը մրցույթում կներկայացնի Դալիթան՝ իր Welcome to Armenia երգով: