ՀՀԿ-ական Հովհաննես Սահակյանն այսօր փաստորեն սենսացիոն հայտարարություն է արել՝ կապված իշխող կոալիցիայի հետագա ճակատագրի հետ: Նա, ինչպես հայտնի է, հայտարարել է , որ ուրբաթ օրը ՀՀԿ- գործադիր նիստում քննարկվել է ՀՀ ներքաղաքական իրավիճակին վերբերող մի շարք հարցեր: Դա չի վերբերում միայն կոալիցիային, ԲՀԿ-ին և ՕԵԿ-ին: Բանախոսն ասել է, որ քննարկումը չի ավարտվել և պայմանվորվածություն կա, որ պետք է շարունակվի այս շաբաթ և ընդհնուր որոշում կկայացվի: Հստակ է, որ ՀՀԿ-ն հինգշաբթի օրը կքննարկի կոալիցիայից ԲՀԿ-ի դուրս գալու հարցը: Սա չափազանց հետաքրքրական հայտարարություն է այն առումով, որ ԲՀԿ-ն ինքը հրապարակավ չի հայտարարել կոալիցիայից դուրս գալու մտադրության մասին:
Այսինքն՝ կա՛մ ՀՀԿ-ականն ակամա խոստովանում է, որ իշխանական կուլիսներում այդ հարցը կա, և արդեն իսկ առաջացել է որոշում կայացնելու անհրաժեշտություն, ինչից պետք է եզրակացնել, որ ԲՀԿ-ն հարցը բարձրացրել է ոչ հրապարակայնորեն և ՀՀԿ պատասխանին է սպասում հրապարակայնացնելու համար, կա՛մ էլ ՀՀԿ-ն ինքն է փորձում ԲՀԿ-ին սադրել: Ընդ որում՝ սադրելը այստեղ կարող է ունենալ երկու իմաստ` սադրել հակառակ հայտարարության, թե մենք չենք լքի կոալիցիան, ու այդպիսով ԲՀԿ-ին պահել կոալիցիայում և կապել լրացուցիչ խոսքով, կամ էլ պարզապես սադրել հենց կոալիցիան լքելուն:
Չի բացառվում, որ ՀՀԿ-ի կամ ավելի ճիշտ՝ Սերժ Սարգսյանի համար ԲՀԿ-ն ներկայումս առավել օգտակար կարող է լինել ընդդիմադիր դաշտում, ուր, մի կողմից, կլինի բավական կառավարելի ընդդիմություն՝ նկատի ունենալով այդ կուսակցությունում չինովնիկական և գործարարական, ըստ էության, կախյալ ներուժի առկայությունը, մյուս կողմից էլ՝ հանրային որոշակի շրջանակներում ունեցած խարիզմատիկ ազդեցությամբ կարող է զգալի մրցակից լինել ընդդիմադիր դաշտի համար և, այսպես ասած, միջամտել ընդդիմադիր կամ բողոքական ընտրազանգվածի ձայները տնօրինելու մրցակցությանը: Զարմանալի չի լինի, եթե ԲՀԿ-ն այդուհանդերձ դիմադրի այդ տարբերակին և մնա Սերժ Սարգսյանի կողքին, համենայն դեպս՝ դե յուրե:
Բանն այն է, որ ԲՀԿ-ին Սերժ Սարգսյանն, ըստ էության, առաջարկում է «Օրինաց Երկրի» տարբերակը, եթե, իհարկե, խոսքը ՀՀԿ-ի սադրանքի մասին է` Ծառուկյանին մղել կոալիցիայից դուրս գալուն: Այդպիսով ԲՀԿ-ն, դուրս գալով կոալիցիայից, անկախ՝ թե որքան անկեղծ մղումներով կգործի կուսակցությունը կոալիցիայից դուրս, հետո նորից կոալիցիա մտելով՝ հայտնվելու է ՕԵԿ-ի վիճակում, իսկ Գագիկ Ծառուկյանը վերածվելու է Արթուր Բաղդասարյան 2-ի, գուցե նույնիսկ՝ 1-ինի: Այդ իսկ պատճառով, ԲՀԿ-ն ներկայումս կա՛մ պետք է մնա կոալիցիայում, կա՛մ դուրս գալուց հետո այլևս երբեք որևէ հուշագիր չստորագրի Սերժ Սարգսյանի հետ, քանի որ դա կարող է լինել կուսակցության և Գագիկ Ծառուկյանի թե՛ քաղաքական, թե՛ նույնիսկ տնտեսական կարիերայի վերջը, քանի որ նրան զրկելով քաղաքական որոշակի վարկանիշից՝ Սերժ Սարգսյանի թիմը, անկասկած, կարճ ժամանակ անց նրան նաև տնտեսական ռեսուրսներից է զրկելու: Հայաստանի ներքաղաքական գործընթացներում ներկայումս բավական մեծացել է տնտեսական վերաբաժանումների գործոնը այն պարզ պատճառով, որ Հայաստանի տնտեսությունը հայտնվել է բավական սուղ ռեսուրսների պայմաններում:
