Ադրբեջանական 1news.az-ին տված հարցազրույցի ժամանակ Վուդրո Վիլսոնի կենտրոնի (Վաշինգտոն) խորհրդական Ալեքսանդր Պետերսենն անդրադարձել է Ղարաբաղյան հակամարտության և հայ-թուրքական հարաբերությունների կարգավորմանն ու տարածաշրջանային էներգետիկ նախագծերի իրագործմանը.
«Վերջին շրջանում մենք ականատես եղանք Ղարաբաղյան հակամարտության շուրջ բազմաթիվ կտրուկ հայտարարությունների։ Բաքուն ու Երևանը պետք է զգուշավորություն ցուցաբերեն իրենց արտահայտություններում։ Ներկայումս առաջնահերթ է համարվում ուղիղ և կառուցողական երկխոսության անցկացումը։
Ինչ վերաբերում է հայ-թուրքական սահմանին, ապա չեմ կարծում, թե այդ սահմանը կբացվի մինչև տարեվերջ։ Այսօր Անկարան և Երևանը պատրաստ չեն լուծել այդ հարցը։ Մերձեցման վերաբերյալ նրանց մոտեցման մեթոդները բավական տարբեր են։ Եթե Ադրբեջանը սկզբում ներառվեր բանակցային գործընթացի մեջ, ապա դա կարող էր դրականորեն անդրադառնալ տարածաշրջանում տիրող իրավիճակի վրա։ Հենց դրա բացակայության պատճառով առաջացավ փակուղային իրավիճակ»։
Տարածաշրջանային էներգետիկ նախագծերի հետ կապված՝ Պետերսենը նշել է. «Շատ լավ նորություն է, որ Եվրահանձնաժողովը որոշել է «Անդրկասպյան» գազամուղի շուրջ բանակցություններ վարել Աշխաբադի ու Բաքվի հետ։ Դա թույլ կտա թուրքմենական գազը փոխադրել Եվրոպա։ Դա կարող է նաև հիմք հանդիսանալ Կասպիցի իրավական կարգավիճակի լուծման համար։
Ասում են, թե ԱՄՆ-ը բավականաչափ չի աջակցում Nabucco գազատարի նախագծին, ինչպես որ «Բաքու-Թբիլիսի-Ջեյհան» նավթամուղի պարագայում էր, սակայն ԱՄՆ-ի քաղաքականությունն այնպիսին է, որ նա չի աջակցում այս կամ այն կոնկրետ նախագծին։ ԱՄՆ-ը ընդհանուր առմամբ աջակցում է Հարավային էներգետիկ միջանցքին։ Արդյունքում ադրբեջանական «Շահ Դենիզ» գազային հանքավայրի մշակմամբ զբաղվող կոնսորցիումը կարող է և չընտրել Nabucco-ն։ Դրանով իսկ մենք ականատես կլինենք ավելի փոքրամասշտաբ նախագծի, որին նախապատվություն կտա այդ կոնսորցիումը»։
Հիշեցնենք, որ օրեր առաջ Ադրբեջանի Հանրապետության պետական նավթային ընկերության (SOCAR) նախագահ Ռովնագ Աբդուլաևը հայտարարել էր, որ «Շահ Դենիզ» գազային հանքավայրի գազի՝ դեպի Եվրոպա փոխադրման երթուղին հայտնի կդառնա մինչև տարեվերջ.
«Ներկայումս Ադրբեջանը դիտարկում է միջազգային կոնսորցիումների ներկայացրած առաջարկները, որոնք առնչվում են «Շահ Դենիզ» գազային հանքավայրի գազի Եվրոպա փոխադրմանը։ Այդ առաջարկների գնահատականը կպահանջի 15-20 օր»։
