News Georgia-ի փոխանցմամբ՝ երեկ երեկոյան Թբիլիսիի պատմական կենտրոնում՝ Հավլաբար թաղամասում, տեղի է ունեցել «Միմինո» ֆիլմի 3 գլխավոր հերոսների Վախթանգ Կիկաբիձեի (Վալիկո Միզանդարի), Ֆրունզիկ Մկրտչյանի (Ռուբիկ Խաչիկյան) և Եվգենի Լեոնովի (Իվան Վոլոխով) ու ֆիլմի ռեժիսոր Գեորգի Դանելիայի հուշարձանի բացումը։
Հուշարձանի հեղինակ, քանդակագործ և նկարիչ, Ռուսաստանի գեղարվեստի ակադեմիայի նախագահ Զուրաբ Ծերեթելին հայտնել է, որ շատ է սիրում ֆիլմի կերպարներին, նրանց մտածելակերպը և փորձել է իր քանդակում պահպանել ֆիլմի ոգին։
Այս հուշարձանը ստեղծվել է 4 տարի առաջ՝ 2008 թվականին Մոսկվայում տեղադրվելու համար, սակայն դա այդպես էլ տեղի չի ունեցել։ Բրոնզյա քանդակները ոչ վաղ անցյալում բերվել են Թբիլիսի և անվերադարձ հանձնվել Վրաստանին։
Հուշարձանի բացման արարողությանը մասնակցել է նաև Վախթանգ Կիկաբիձեն, ով նշել է. «Հուշարձանը կանգնեցվել է հենց այն վայրում, որտեղ որ այն պետք է լիներ, այսինքն՝ այս հին թաղամասում՝ Հավլաբարում։ Ես շատ երջանիկ եմ, որ այսօր այստեղ հավաքվել են այսքան շատ մարդիկ։ Ես ձեզ բոլորիդ շատ եմ սիրում։ Ցավոք, այսօր մեզ հետ չեն Ֆրունզիկ Մկրտչյանը և Եվգենի Լեոնովը»։
Հուշարձանի բացման արարողությանը ներկա է եղել նաև Վրաստանի առաջին տիկին Սանդրա Ռուլովսը, ինչպես նաև բազմաթիվ հյուրեր Հայաստանից, Բելառուսից, Ուկրաինայից ու Լիտվայից։
Դիլիջանի քաղաքապետ Արմեն Սանթրոսյանը հուշարձանի բացման արարողակարգի ժամանակ Վախթանգ Կիկաբիձեին շնորհել է այդ քաղաքի պատվավոր քաղաքացու կարգավիճակ՝ նրա ստեղծագործական արժանիքների ու երկու ժողովուրդների բարեկամության ամրագրման մեջ ունեցած ներդրման համար։
Հիշեցնենք, որ «Միմինո» ֆիլմի 3 գլխավոր հերոսներին նվիրված հուշարձան 4 տարի առաջ բացվել է նաև Սոչիում, իսկ այս տարվա հուլիսին՝ նաև Դիլիջանում։
Ի դեպ, «Միմինո» (բազե) ֆիլմը ստեղծվել է 1978 թվականին և նույն թվականին ԽՍՀՄ կինոթատրոններում հավաքել է 24.4 միլիոն հանդիսատես՝ զբաղեցնելով 17-րդ տեղը։
