Թուրքիայի տարածաշրջանային նկրտումների, մասնավորապես Սիրիայի և Իրաքի նկատմամբ ունեցած ծրագրերի տարածաշրջանային նշանակությանն ու դրանցում Հայաստանի դերի մասին այսօր լրագրողների հետ հանդիպման ժամանակ անդրադարձան իրանագետ, պատմական գիտությունների թեկնածու Ռուդոլֆ Յարալյանը, թուրքագետ Անդրանիկ Իսպիրյանը:
Յարալյանը նկատեց, որ Հայաստանը մոտ ապագայում ակտիվ դերակատարություն է ունենալու տարածաշրջանային գործընթացներում և այդ տեսանկյունից հատկանշական է ԵՄ անդամ Ֆրանսիայի նախագահ Սարկոզիի այցը Երևան: Ըստ Յարալյանի՝ այդ այցի ժամանակ հնչեցին հայտարարություններ, որոնք ցույց տվեցին Եվրոպայի դիրքորոշումը Հայաստանի տարածաշրջանային գործընթացներին ներգրավվածության վերաբերյալ. «Պարզ է, որ Եվրոպան այդ գործընթացները պատկերացնում է Հայաստանի ակտիվ մասնակցությամբ, ինչը որոշակի հարված է Թուրքիայի նեոպանթուրքիստական ծրագրերի իրականացմանը տարածաշրջանում և դրանով Եվրոպան նաև իր պատրաստակամությունը հայտնեց հակազդելու այդ ծրագրերին»:
Նա նաև նկատեց, որ եվրոպական երկրները լայնածավալ ծրագրեր են փորձում մշակել մեր տարածաշրջանում, և Հայաստանը դրանցում ունենալու է ակտիվ դերակատարություն:
Անդրանիկ Իսպիրյանն էլ նշեց, որ Թուրքիայի Իրաք ներխուժելու պարագայում լուրջ զարգացումներ Հայաստանում չեն լինի, սակայն հաշվի առնելով այն հանգամանքը, որ Հայաստանում ևս ապրում են քրդեր, ապա հարցեր կլինեն կապված քրդերի համագործակցության հետ:
Իսպիրյանը նկատեց, որ Ֆրանսիան Թուրքիայի հետ ուներ վաղեմի հաշիվներ և Հայաստան այցը Սարկոզին օգտագործեց Թուրքիային ևս մեկ անգամ իր տեղը ցույց տալու համար:
