Ադրբեջանական Trend լրատվական գործակալության փոխանցմամբ՝ Իրանի ԱԳՆ մամլո քարտուղար Ռամին Մեհմանփարասթը Թաթարստանի մայրաքաղաք Կազանում նշել է, որ եթե Հայաստանն ու Ադրբեջանը համապատասխան ցանկություն հայտնեն, ապա Իրանը պատրաստ է հանդես գալ ղարաբաղյան հակամարտության կարգավորման առաջարկների ներկայացմամբ։
Մեհմանփարասթը նշել է, որ արտաքին ուժերը ձգտում են օգտագործել այդ հակամարտությունը՝ տարածաշրջանային հարցերին միջամտելու համար. «Իրանը հանդես է գալիս ղարաբաղյան բանակցային գործընթացի շարունակման օգտին և պատրաստ է աջակցել այդ խնդրի լուծմանը։ Իրանն ու Ռուսաստանը կարող են էական դեր խաղալ տարածաշրջանում ուժերի հավասարակշռման տեսանկյունից»։
Հիշեցնենք, որ վերջին շրջանում իրանական կողմը բազմիցս հայտարարել է, որ տարածաշրջանային հակամարտությունների կարգավորմամբ պետք է զբաղվեն հենց տարածաշրջանային, ոչ թե այլ երկրները, քանի որ տարածաշրջանային երկրներն առավել ծանոթ են տարածաշրջանի իրողություններին։
