Հայաստանյան քրեակատարողական հիմնարկներում խնդիրները բազմաթիվ են, դրանցից շատերում բուժանձնակազմ ընդհանրապես չկա. «Ծանր հիվանդության հետևանքով պատժից ազատման համակարգի խնդիրները Հայաստանում» զեկույցի ներկայացման ժամանակ այս մասին այսօր հայտարարեց ՔԿՀ-ներում հասարակական դիտորդների խմբի անդամ, բժիշկ Լաուրա Գասպարյանը:
Նրա խոսքով՝ «Վանաձոր» քրեակատարողական հիմնարկում բժիշկ առհասարակ չկա, մյուսներում բացակայում են դատապարտյալների հիվանդության մասին վկայող քարտեր կամ դրանցում չկան համապատասխան գրառումներ: «Մյուս հարցը ՔԿՀ-ներում հետազոտությունների անցկացման խնդիրն է: Հաճախ մեծ դժվարություն է դառնում հետազոտության նպատակով դատապարտյալներին մի քրեակատարողական հիմնարկից մյուսը տեղափոխելը: Մեզ մտահոգում է նաև այն հանգամանքը, որ դատապարտյալների հետ աշխատող միևնույն բժիշկը կարող է երկրորդ անգամ էլ հետազոտություն անցկացնել և տալ նույն եզրակացությունը, ինչ որ առաջին անգամ էր տվել»,- նկատեց մասնագետը` հավելելով, որ որքան էլ հիվանդությունը, ասենք, սրված լինի, նա իր առաջին եզրակացությունն, ամենայն հավանականությամբ, անփոփոխ կթողնի:
Լաուրա Գասպարյանը նշեց նաև, որ ՔԿՀ-ներում աշխատող բժիշկների անբավարար քանակությունը հաճախ հանգեցնում է աշխատանքի անարդյունավետության, հետազոտությունների դանդաղ ընթացքի:
Քաղաքացիական հասարակության ինստիտուտի իրավաբան Արման Զրվանդյանն իր հերթին ավելացրեց, որ իր պրակտիկայում չի հիշում մի դեպք, երբ դատարանի կայացրած վճռի վրա ակնհայտ լինի դատապարտյալի հիվանդության փաստը: «Ոլորտին լուրջ բարեփոխումներ են անհրաժեշտ. Նախ՝ մարդասիրության սկզբունքի ներդրում, այնուհետև՝ հիվանդի ախտորոշում լավագույն մասնագետների կողմից: Մեզ համար անհասկանալի է վարչական աշխատողների վերահսկողությունը բժշկական ախտորոշումների հանդեպ»,- նկատեց Արման Զրվանդյանը:
Քննարկմանը ներկա արդարադատության նախարարության ներկայացուցիչ Նիկոլայ Առուստամյանը իր հերթին չհամաձայնեց բանախոսների կողմից բարձրաձայված գրեթե բոլոր թերացումների հետ: «Ասում եք` պետք է մարդասիրության սկզբունք ներդրվի: Բայց մի՞թե օրենսդիրը նման հնարավորություն արդեն իսկ չի սահմանել»,-հռետորական հարց հնչեցրեց նա:
Առուստամյանի խոսքով, ինքը միաժամանակ չի պնդում, որ ոլորտում խնդիրներ առհասարակ չկան: «Նույնիսկ կասեմ, որ ոլորտում ավելի շատ խնդիրներ կան, քան դուք եք բարձրաձայնում»,- նկատեց նա: