Ինչպես տեղեկացրել էինք՝ այսօր՝ ժամը 12.30-ին, ՀՀ տարածքում՝ Գառնիից 10 կմ արևմուտք, տեղի է ունեցել 3,5 մագնիտուդով երկրաշարժ, որի հիպոկենտրոնը գտնվել է 7 կմ խորության վրա, էպիկենտրոնային գոտում ուժգնությունը կազմել է 5 բալ։
Երևանում և Աբովյան քաղաքում երկրաշարժն զգացվել է 3-4 բալ ուժգնությամբ:
Ժամը 12.31-ին և 12.32-ին երկրաշարժին հետևել է երկու հետցնցում` համապատասխանաբար` 2.0 և 3.0 մագնիտուդով։
ՀՀ ԱԻՆ սեյսմիկ պաշտպանության ազգային ծառայության տնօրեն Հրաչյա Պետրոսյանը, մեզ հետ զրույցում մեկնաբանելով տեղի ունեցածը, ասաց. «Նախնական տվյալներով՝ այժմ տեղի է ունենում սեյսմիկ էներգիայի մարում, և այս պահին որևէ հիմք չկա ենթադրելու, որ ավելի ուժեղ ցնցում է լինելու: 5 բալանոց ցնցումը գտնվում է թույլ սեյսմիկ ֆոնի մեջ, և այն չենք կարող հիմք ընդունել որպես շարունակական բնույթ ունեցող: Թույլ երկրաշարժից հետո արձանագրվել է ութ հետցնցում:
Կոչ ենք անում մարդկանց պահպանել հանգստություն և ուշադրություն չդարձնել խուճապարարների տարածած ստահոդ լուրերին: Աշխարհում որևէ գիտնական, որևէ սեյսմիկ ծառայություն դեռևս չի կարող անել երկրաշարժի կարճաժամկետ կանխատեսում, այսինքն՝ ճշգրիտ ասել երկրաշարժի ժամը, տեղն ու ուժգնությունը»:
Իսկ արտակարգ իրավիճակների նախարարության լրատվական վարչության պետ Նիկոլայ Գրիգորյանը, մեզ հետ զրույցում խոսելով հավանական երկրաշարժի ռիսկերի մասին, ավելացրեց. «Աշխարհում որևէ երկիր մինչ օրս չի կարող ասել, թե հերթական երկրաշարժը երբ կլինի և ինչ ուժգնությամբ: Հետևաբար, դժվար է ասել՝ կլինի՞, թե՞ չի լինի։ Նույնը մինչև այս երկարշարժը՝ ոչ ոք չէր կարող ասել, թե երբ կլինի և ինչ ուժգությամբ»:
