«Արմատ» ակումբում այսօր հյուրընկալված քաղաքագետ Հրանտ Մելիք-Շահնազարյանն անդրադարձավ Ռուսաստանին և ԵԱՀԿ-ին ուղղված մեղադրանքներին, Ֆրանսիայի նախագահ Նիկոլա Սարկոզիի նախաձեռնությամբ Հայաստանի և Ադրբեջանի նախագահների հանդիպմանը:
Հրանտ Մելիք- Շահնազարյանն, անդրադառնալով Ադրբեջանի վերջին մեղադրանքների, թե հայերին պաշտպանում են, ասաց. «Ադրբեջանն անընդհատ հայտարարում է, որ պատրաստ է պատերազմի, նրանց այս քարոզչությունը արդեն հասկանում են բոլորը: Վերջին մեկ ամսվա ընթաքում Հայաստանին ուղղված մեղադրանքների ներկայացումը պայմանավորված է սեպտեմբերի 21-ին կայացած ռազմական շքերթով, երբ տեսան, որ Հայաստանը չի զիջում իր կարողություններով»:
«Իրական բանակցային գործընթաց գոյություն չունի ներկա պահին»,- կարծում է քաղաքագետը` նկատի ունենալով Դ. Մեդվեդեւի ակտիության նվազումը եւ արդեն իսկ «էստաֆետան»` Ֆրանսիային փոխանցելը: «Ես չեմ բացառում, որ Ֆրանսիան հաջողության հասնի: Այստեղ բոլոր ջանքերը պայմանավորված են Թուրքիայի ակտիվության փորձերով: Ֆրանսիայի մեսիջներն էլ էին ուղղված դրան»,- նշեց նա:
Երեք համանախագահող երկրներում նախընտրական տարիներ են, արդյո՞ք չի սառեցվի գործընթացը. «Վաղուց Մինսկի խումբը վերածվել է կոնսուլտատիվ մի մարմնի: Մեծ հաշվով` երեք պետությունների համար կարեւորը պատերազմի չվերսկսումն է, ինչն էլ նրանց հաջողվել է»:
