ԱՄՆ նախագահ Դոնալդ Թրամփը չորեքշաբթի օրը անսպասելիորեն Թուրքիայից մեկնել է հին «Air Force One»-ով, այլ ոչ թե Կատարի կողմից տրամադրված և վերջերս արդիականացված նոր նախագահական ինքնաթիռով, որով ժամանել էր երկիր։
Սակայն ավելի ուշ, Մեծ Բրիտանիայում, նա նստել է նոր ինքնաթիռը՝ Վաշինգտոն վերադառնալու համար։
Թրամփի այցը Թուրքիա՝ ՆԱՏՕ-ի գագաթնաժողովին մասնակցելու նպատակով, նոր ինքնաթիռի առաջին միջազգային թռիչքն էր։ Այն իրականացվել է Իրանի հետ լարվածության և ռազմական գործողությունների սրման պայմաններում։ Ինքնաթիռի անսպասելի փոխարինումը հաջորդել է Կատարի նվիրած շքեղ օդանավի վերաբերյալ ամիսներ շարունակվող քննարկումներին ։ Այն նախատեսված էր որպես ժամանակավոր փոխարինող, քանի դեռ «Boeing»-ը շարունակում էր ուշացնել հաջորդ սերնդի «Air Force One» ինքնաթիռների մատակարարումը։
Նոր ինքնաթիռի շուրջ քննարկումների ընթացքում քննադատները հարցականի տակ էին դրել դրա արդիականացման արժեքը, անվտանգության մակարդակը և աշխատանքների արագ իրականացումը։
Թրամփը «Truth Social» հարթակում հայտնել էր, որ Անկարայից մինչև Մեծ Բրիտանիայի «RAF Mildenhall» ռազմաօդային բազա կթռչի «Air Force One»-ի հին կապույտ ինքնաթիռով՝ «ի հիշատակ հին օրերի»։ Միաժամանակ նա նշել էր, որ նոր նախագահական ինքնաթիռը նույնպես կանգառ կկատարի նույն բազայում, որպեսզի այնտեղ ծառայող ամերիկացի զինվորականները հնարավորություն ունենան տեսնելու այն։
Անկարայում լրագրողների հարցին, թե արդյոք Թուրքիայից մեկնելու երթուղու փոփոխությունը պայմանավորված էր մահափորձի սպառնալիքով, Թրամփը հստակ պատասխան չի տվել։ Նա, սակայն, ընդունել է, որ նման վտանգ կարող էր գոյություն ունենալ։
«Ես Իրանի թիրախների ցուցակում առաջինն եմ»,— ՆԱՏՕ-ի գագաթնաժողովի ավարտից հետո կայացած մամուլի ասուլիսում հայտարարել է նա։ «Չգիտեմ։ Չեմ կարող այդ մասին ասել, բայց, անկեղծ ասած, դա ինձ համար առանձնապես նշանակություն չունի»։
Կատարի կողմից իրականացված արդիականացման աշխատանքներն ավարտվել էին անսովոր արագ, ինչի հետևանքով մի շարք փորձագետներ մտահոգություն էին հայտնել, որ նոր ինքնաթիռը կարող է անվտանգության առումով զիջել գործող «Air Force One»-ին։
Թուրքիայում գտնվելու ընթացքում Թրամփը հայտարարել էր, որ մինչև Միացյալ Նահանգներ վերադառնալը նոր նախագահական ինքնաթիռը կանգառներ կկատարի Եվրոպայի երկու կամ երեք խոշոր ռազմաբազաներում, որպեսզի ամերիկացի զինվորականները կարողանան տեսնել այն, քանի որ, նրա խոսքով, «այն իսկապես հոյակապ է»։ Սակայն, ըստ ամենայնի, օդանավի միակ կանգառը եղել է բրիտանական «RAF Mildenhall» ռազմաօդային բազան։
Չորեքշաբթի երեկոյան Թրամփը սոցիալական ցանցերում հայտնել է, որ վայրէջք է կատարել «RAF Mildenhall» ռազմաօդային բազայում և «դիմավորել մեր նոր նախագահական Air Force One ինքնաթիռը»։
