Ադրբեջանական APA լրատվական գործակալության փոխանցմամբ՝ Ադրբեջանի և Ավստրիայի նախագահներ Իլհամ Ալիևն ու Հայնց Ֆիշերը համատեղ մամլո ասուլիս են տվել։
Ալիևը մեծապես կարևորել է Ֆիշերի ադրբեջանական այցը, քանի որ դա Ավստրիայի նախագահի առաջին այցն է Ադրբեջան։ Ալիևը նշել է, որ Ֆիշերի հետ հանդիպման ժամանակ նրան իրազեկել է ղարաբաղյան հակամարտության կարգավորման մասին՝ ընդգծելով, որ Հայաստանը շարունակում է անտեսել ՄԱԿ-ի և միջազգային այլ կառույցների ընդունած բանաձևերը։
Ալիևը նաև հայտարարել է, որ ներկայումս Ադրբեջանում գործունեություն են ծավալել ավստրիական 40 ընկերություններ, և որ Ադրբեջանի գազային պաշարները կազմում են 2.6 տրիլիոն խորանարդ մետր, ինչը կարող է իր ներդրումն ունենալ ԵՄ հետ համագործակցության գործում։
Հայնց Ֆիշերն իր հերթին շնորհավորել է Ալիևին՝ անկախության 20-ամյակի կապակցությամբ՝ ընդգծելով, որ Ավստրիան Ադրբեջանի հետ դիվանագիտական հարաբերություններ հաստատած առաջին երկրներից մեկն է։
Ֆիշերը նաև կարևորել է խաղաղ ճանապարհով ղարաբաղյան հակամարտության կարգավորումը։
