Մայիսի 19-ին պաշտոնական այցով Չինաստան ժամանած ՌԴ նախագահ Վլադիմիր Պուտինը Պեկինում ՉԺՀ նախագահ Սի Ծինպինի հետ բանակցություններից հետո երկու երկրների փոխգործակցությունն անվանել է օրինակելի։
«Մեր օրինակը մոդել է այն բանի, թե ինչպես է պետք այսօր հարաբերություններ կառուցել երկրների ու ժողովուրդների միջև»,- հայտարարել է նա՝ հավելելով, որ այս տանդեմը կայունացնող դեր ունի աշխարհում։
Մի շարք համաձայնագրերի ստորագրումից հետո ՌԴ նախագահը հայտնել է, որ կողմերը նոր քայլեր են անում տնտեսական կապերի ընդլայնման ուղղությամբ։ «Խոսքը նաև գնում է կրիտիկական կարևորության տարրերի և մետաղների ոլորտում գործընկերության ամրապնդման մասին, որոնք անհրաժեշտ են կանաչ տեխնոլոգիաների ավելի լայն ներդրման համար»,- ասել է նա։
Պուտինը նաև ընդգծել է, որ Մոսկվան ու Պեկինը ստեղծել են ռուբլով և յուանով պաշտպանված առևտրային համակարգ, պատրաստ են շարունակել էներգակիրների անխափան մատակարարումները, ավարտին են հասցնում չինական ԱԷԿ-ի էներգաբլոկների կառուցումը և արդեն քաղում են երկկողմ առանց վիզայի ռեժիմի դրական արդյունքները։
