Սլովակիայի խորհրդարանը երեկ մերժել է Ֆինանսական կայունության եվրոպական հիմնադրամի իրավասություններն ավելացնելու օրինագիծը, որը համաձայնեցվել էր եվրոգոտու երկրների ղեկավարների կողմից ընթացիկ տարվա հուլիս ամսին: Այս մասին հաղորդում է BBC-ն: Մենք երեկ տեղեկացրել էինք, որ Սլովակիայի կողմից նման խոչընդոտների ստեղծումը կապված է իշխանական կոալիցիայի ներսում տեղի ունեցող զարգացումների հետ:
Հիմնադրամի իրավասությունների ավելացումն անհրաժեշտ քայլ է եվրոգոտու համար, որպեսզի հնարավոր լինի կայունացնել ֆինանսական վիճակը այդ արտարժույթի գործողության տարածքում: Սակայն դրա համար անհրաժեշտ է, որպեսզի եվրոգոտու բոլոր 17 երկրները համաձայնեն նման քայլին: Սլովակիան վերջինն է, ում սպասում են մյուս 16 երկրները` այդ ծրագիրը կյանքի կոչելու համար: