Միացյալ Նահանգների նախագահ Դոնալդ Թրամփը Պեկինում բարձրացրել է ԱՄՆ-ի, Ռուսաստանի և Չինաստանի միջև հնարավոր միջուկային համաձայնագրի կնքման հարցը։ Ինչպես հաղորդում է Associated Press լրատվական գործակալությունը, այս մասին նա հայտնել է նախագահական ինքնաթիռում լրագրողների հետ զրույցում։
Թրամփը ցանկանում է, որ երեք երկրները ստորագրեն համաձայնագիր, որը կսահմանափակի յուրաքանչյուրի զինանոցում առկա միջուկային մարտագլխիկների քանակը։
ԱՄՆ նախագահի խոսքով՝ Չինաստանի ղեկավար Սի Ծինփինը դրականորեն է վերաբերվել այդ գաղափարին, երբ նա հարցը բարձրացրել է իրենց անձնական զրույցների ժամանակ։
«Ես շատ դրական արձագանք ստացա։ Սա սկիզբն է», – լրագրողներին ասել է Թրամփը։
Ռուսաստանի և Միացյալ Նահանգների միջև կնքված միջուկային զենքի վերջին համաձայնագրի ժամկետը լրացել է 2026-ի փետրվարին՝ ավելի քան 50 տարվա մեջ առաջին անգամ վերացնելով երկու խոշորագույն միջուկային զինանոցների վրա որևէ սահմանափակում։
Պենտագոնի գնահատականներով՝ Պեկինի զինանոցը գերազանցում է 600-ից ավելի գործող միջուկային մարտագլխիկ և հեռու է ԱՄՆ-ի և Ռուսաստանի զինանոցի հետ հավասար լինելուց, որոնցից յուրաքանչյուրը, ըստ գնահատականների, ունի ավելի քան 5000 միջուկային մարտագլխիկ։
