Վաշինգտոնը Թեհրանն ամենամեծ սպառնալիքն է համարում Մերձավոր Արևելքում: Այդ մասին նշվել է ահաբեկչությանը հակազդման ԱՄՆ-ի թարմացված ռազմավարության մեջ, որը հրապարակել է Սպիտակ տունը։
«Միացյալ Նահանգների համար Մերձավոր Արևելքի կողմից ամենամեծ սպառնալիքը գալիս է Իրանից՝ ուղղակիորեն նրա միջուկային ու հրթիռային ներուժի տեսքով և անուղղակիորեն՝ միլիարդավոր դոլարների տեսքով, որոնք այն ուղղորդում է իր ահաբեկչական պրոքսիներին, այդ թվում՝ «Հեզբոլլահ»-ին», – ասվում է փաստաթղթում։
Նաև նշվում է, որ ԱՄՆ նախագահ Դոնալդ Թրամփի «վճռական գործողությունները կշարունակվեն այնքան ժամանակ, մինչև Թեհրանի ռեժիմը չդադարի սպառնալիք ներկայացնել Միացյալ Նահանգների համար»։
Ռազմավարության մեջ նշվում է, որ, ընդհանուր առմամբ, ահաբեկչական սպառնալիքը փոխվել է, և երկիրը բախվում է ահաբեկչության երեք հիմնական տեսակի հետ՝ «թմրաահաբեկիչների և անդրազգային խմբավորումների, ավանդական իսլամիստական ահաբեկիչների և ձախ արմատական ծայրահեղականների»։
«Մենք կարող ենք լուծել այս խմբերից յուրաքանչյուրի հարցը, բայց սպառնալիքն զգալի է և թափանցում է ամենուր», – ընդգծվում է փաստաթղթում։
Բացի այդ, ռազմավարության համաձայն, Եվրոպայի երկրներն ԱՄՆ-ի համար մնում են «առաջատար և երկարաժամկետ գործընկերներ ահաբեկչության դեմ պայքարում»։
Դրա հետ մեկտեղ Վաշինգտոնը կարծում է, որ «անթույլատրելի է, որ ՆԱՏՕ-ի գծով հարուստ դաշնակիցները ծառայեն որպես «ֆինանսական, լոգիստիկ և հավաքագրման կենտրոն ահաբեկիչների համար»։
Եվրոպան, ինչպես նշվում է տեքստում, «լուրջ սպառնալիքի տակ է և ինչպես թիրախ է ահաբեկիչների համար, այնպես էլ ահաբեկչական սպառնալիքների բուծարան»։
Այս առումով Վաշինգտոնում կոչ են անում եվրոպական երկրներին «անհապաղ զգալիորեն մեծացնել հակաահաբեկչական ջանքերը»։
