Իրանի արտաքին գործերի նախարար Աբբաս Արաղչին, ժամանելով Սանկտ Պետերբուրգ, ամփոփել է իր տարածաշրջանային այցերի արդյունքները և ներկայացրել Ռուսաստանի հետ բանակցությունների առանցքային թեմաները։ Ըստ նախարարի՝ Թեհրանը վերսկսում է ակտիվ դիվանագիտական խորհրդակցությունները, որոնք ընդհատվել էին պատերազմական իրավիճակի պատճառով։
Արաղչին առանձնահատուկ շեշտադրել է Պակիստանի դերը՝ որպես Իրան-ԱՄՆ բանակցությունների կարևոր միջնորդ։ Նա խոստովանել է, որ նախորդ փուլում բանակցությունները չեն հասել իրենց նպատակին ԱՄՆ-ի «սխալ մոտեցումների և չափազանցված պահանջների» պատճառով։ Այժմ Իսլամաբադի հետ քննարկվել են այն պայմաններն ու ուղղությունները, որոնց դեպքում երկխոսությունը կարող է շարունակվել՝ հաշվի առնելով Իրանի «քառասնօրյա դիմադրության» արդյունքում ստեղծված նոր իրավիճակը։
Օման կատարած այցի մասին խոսելիս նախարարը կարևորել է Հորմուզի նեղուցի հարցը։ Լինելով նեղուցը վերահսկող երկու հիմնական պետություններ՝ Իրանն ու Օմանը պայմանավորվել են սերտորեն համակարգել քայլերը՝ ապահովելու անվտանգ նավագնացությունը, ինչը համաշխարհային նշանակության խնդիր է։
Սանկտ Պետերբուրգում Արաղչին մտադիր է ռուսական կողմի հետ համադրել դիրքորոշումները տարածաշրջանային զարգացումների շուրջ՝ նշելով, որ Մոսկվայի հետ ռազմավարական խորհրդակցությունները կրում են մշտական բնույթ։
«Ինչպես տեսնում եք, մենք Ռուսաստանի հետ միշտ սերտ խորհրդակցություններ ենք ունեցել հարցերի լայն շրջանակի, հատկապես տարածաշրջանային հարցերի շուրջ, վարել ենք մշտական երկկողմ բանակցություններ», – ասել է նա:
