Բեռլինում ՌԴ արտակարգ և լիազոր դեսպան Սերգեյ Նեչաևը հրավիրվել է Գերմանիայի արտաքին գործերի նախարարություն: Այդ մասին ԳԴՀ արտաքին քաղաքական գերատեսչությունը տեղեկացրել է սոցիալական X հարթակում արված գրառման միջոցով: Ըստ այդմ, Ռուսաստանի դեսպանը «հրավիրվել է Գերմանիայի դեմ աճող սպառնալիքների կապակցությամբ»:
Գերմանական կողմը Ռուսաստանի դեսպանին իրազեկել է, որ ՌԴ պաշտպանության նախարարության կողմից ԳԴՀ տարածքում ռազմական արդյունաբերության ընկերությունների հասցեական տեղանշումը «հետապնդում է Ուկրաինային ցուցաբերվող աջակցությունը թուլացնելու նպատակ»: Ըստ պաշտոնական գրառման, Բեռլինը Մոսկվային իրազեկել է, որ «նման սպառնալիքը և բոլոր տեսակի լրտեսական գործողությունները անընդունելի» են: Գերմանիայի ԱԳՆ-ն եզրափակել է, որ իրեն «վախեցնել հնարավոր» չէ:
Ինչպես հայտնի է, Ռուսաստանի պաշտպանության նախարարությունը եվրոպական երկրներում Ուկրաինայի կարիքների համար սպառազինությունների արտադրությունը գնահատել է որպես «պատերազմին ուղղակիորեն ներգրավվելու վկայություն», իսկ Անվտանգության խորհրդի քարտուղար Սերգեյ Շոյգուն հայտարարել է, որ «այդ ձեռնարկությունները ՌԴ համար օրինական թիրախ» են:
Գերմանիան եվրոպական առաջին երկիրն է, որ արձագանքել է ՌԴ ՊՆ հրապարակմանը և ԱԽ քարտուղար Շոյգուի սպառնալիքին: Բեռլինի պատասխանը հստակ է՝ Ուկրաինային ռազմական աջակցությունը շարունակվելու է, Ռուսաստանի կեցվածքն անընդունելի է: Ըստ երևույթին, դեր է խաղացել նաև այն, որ ՌԴ արտաքին գործերի նախարար Լավրովը Գերմանիայն «նացիզմի վերածննդի նպատակադրվածություն» է վերագրել:
Ըստ տեղեկությունների, Բեռլինում «լրջորեն քննարկվում է զինվորական պարտադիր ծառայությունը վերականգնելու, ինչպես նաև ռազմական արդյունաբերությունը լիովին արդիականացնելու ծրագիրը»: Գերմանիայի կանցլեր Մերցը եվրոպական անվտանգության նոր ճարտարապետության ջատագով է: ՌԴ արտգործնախարար Լավրովը նույնիսկ կանխատեսել է, որ Գերմանիան Ֆինլանդիայի հետ «ռազմական դաշինք է քննարկում»:
Ֆինլանդիան, ինչպես հայտնի է, ՆԱՏՕ-ին անդամակցել է Ուկրաինայի դեմ Ռուսաստանի սանձազերծած պատերազմից հետո: Ռուսաստանի արտգործնախարարը քարոզչական տիրույթում փաստացի վերականգնել է Երկրորդ համաշխարհային պատերազմի նախօրեի ռազմաքաղաքական իրավիճակը, երբ Ֆինլանդիան Գերմանիայի դաշնակիցն էր, ինչը առիթ հանդիսացել, որպեսզի ԽՍՀՄ-ը նրան պատերազմ հայտարարի և գրավի զգալի տարածքներ:
Բարդ է ասել, որ Մոսկվան «նույն սցենարը քննարկում» է նաև այսօր, բայց եվրոպական միանգամից մի քանի երկրի հասցեին Շոյգուի հնչեցրած սպառնալիքը թույլ է տալիս ենթադրել, որ Ռուսաստանը Եվրոպայի հետ ռազմական դիմակայությունը չի բացառում: Ռուսաստանյան մամուլում արծարծվում է «ՆԱՏՕ-ի կողմից Կալինինգրադի մարզի շրջափակման հավանականությունը»: Ավելի վաղ նախկին փոխվարչապետ Դմիտրի Ռոգոզինը բաց խոսել է «Սուվալյան միջանցքը գրավելու անհրաժեշտության» մասին: Խոսքը Լատվիայի տարածքի այն հատվածի մասին է, որ Բելառուսի միջոցով Ռուսաստանի և նրա անկլավ Կալինինգրադի միջև ցամաքային կապ է ապահովում:
