ԱՄՆ և ՌԴ նախագահներ Բարաք Օբաման և Դմիտրի Մեդվեդևը պետք է դեռ մայիսին Դովիլում տեղի ունեցած G8-ի գագաթնաժողովի ժամանակ համատեղ հայտարարություն անեին հակահրթիռային պաշտպանության վերաբերյալ, սակայն վերջին պահին ԱՄՆ առաջնորդի հրաժարվելու պատճառով դա տեղի չունեցավ: Այս մասին գրում է Коммерсант թերթը:
Թերթի տրամադրության տակ հայտնվել է մի փաստաթուղթ, որը վերլուծելով՝ փորձագետները եկել է այն եզրակացության, որ խնդիրների շուրջ տարաձայնություններն այնքան խորն են, որ փոխզիջման գալու հույսեր գործնականում չեն մնացել: Պարբերականը նշում է, որ կողմերը չեն կարողացել համաձայնության գալ անգամ միանգամայն անմեղ ձևակերպումների շուրջ: Այս թեմայով բանակցությունների լիակատար ձախողման հետ կապված՝ ՌԴ ԱԳՆ աղբյուրը կարծիք է հայտնել, որ հաջորդ տարվա մայիսին նախատեսվող Ռուսաստան-ՆԱՏՕ հերթական գագաթնաժողովը տեղի չի ունենա:
Թերթը գրում է, որ թեև տարաձայնությունները կարգավորելու նախաձեռնությունը Վաշինգտոնի կողմից էր, հենց ամերիկյան կողմն էլ վերջին պահին տապալեց այն:
Փաստաթղթի ներածական մասում ասվում է, որ կողմերը համատեղ կաշխատեն Ռուսաստանի և ՆԱՏՕ-ի միջև հակարհթիռային պաշտպանության ռազմավարական համագործակցության, ինչպես նաև «համընդհանուր խաղաղություն և անվտանգություն» ստեղծելու շուրջ:
Թերթը գրում է, որ փաստաթղթի տեքստը համաձայնեցվել է, սակայն արդեն Դոովիլում ԱՄՆ առաջնորդը հրաժարվել է այն ստորագրել: Որոշ տվյալներով` Օբամայի վրա ազդեցություն են ունեցել ԿՀՎ և Պենտագոնի ներկայացուցիչները:
Վերջին շաբաթներին Ռուսաստանի իշխանությունները բացահայտ հայտարարում են, որ հակահրթիռային պաշտպանության բանակցությունները տապալվել են, և այժմ ՌԴ-ն երկու տարբերակ ունի` կամ ստեղծել սեփական հակահրթիռային պաշտպանություն կամ միջուկային պոտենցիալը հարստացնել:
Դիտորդները, այնուամենայնիվ, որոշակի հույսեր են կապում ԱՄՆ պետքարտուղարի տեղակալ Էլեն Թոշերի՝ Մոսկվա նախատեսվող այցի հետ: Коммерсант-ի տվյալներով` նա կմասնակցի հակարթիռային պաշտպանության հարցերի քննարկումներին: Մյուս կոմղից՝ Ռուսաստանի ԱԳՆ-ում արդեն չեն հավատում որևէ փոխհամաձայնության: Դիվանագետները կոչ են անում այս հարցի լուծմանը չսպասել նաև նոյեմբերին նախատեսվող Օբամա-Մեդվեդև հանդիպումից: Նրանք կարծում են, որ Մեդվեդևին այդպես էլ չի հաջողվի ԱՄՆ-ի հետ համաձայնության գալ: