Վրացական GHN լրատվական գործակալության փոխանցմամբ՝ ընդդիմադիր «Դեմոկրատական շարժման» առաջնորդ Նինո Բուրջանաձեն հայտարարել է, որ եթե նախագահ Միխեիլ Սաակաշվիլին շարունակի իշխել Վրաստանում, ապա այդ երկիրը կդադարի գոյություն ունենալուց.
«Քաղաքական կյանքը կենդանի օրգանիզմ է։ Դա դինամիկ գործընթաց է։ Գոյություն ունեն քաղաքական կյանքի ակտիվ փուլեր, ինչպես որ այս տարվա մայիսի 26-ին էր։ Այժմ մեզ նոր ռազմավարություն է պետք, և մենք նորովի ենք գործելու։
Փողոցային ակցիաները կարդարացնեին իրենց, եթե հասարակության մեծ մասը չնախընտրեր նստել հեռուստացույցի առջև, և եթե նրանք փողոց դուրս գային, ինչպես որ եղավ Եգիպտոսում և այլ երկրներում։ Եթե մենք միջոցներ չձեռնարկենք, ապա Սաակաշվիլիի բռնապետությունը Վրաստանում կարող է շարունակվել ևս 30 տարի։
Բռնապետերն աստիճանաբար չեն հրաժարվում իրենց իշխանությունից։ Պինոչետն իր պոստը թողեց 95 տարեկան հասակում, երբ ոչնչացրել էր Չիլիի բնակչության գրեթե կեսին։ Եթե մենք սպասում ենք, որ Վրաստանի կեսը ոչնչացվի, բնակչության կեսը լքի երկիրը, որպեսզի կերակրի մյուս կեսին, իսկ մի մասն էլ հայտնվի բանտերում, ապա Սաակաշվիլին կիշխի ևս 30 տարի»։
