Ռուսական Regnum լրատվական գործակալության փոխանցմամբ՝ ՆԱՏՕ-ում ԱՄՆ-ի պատվիրակությունն աջակցել է Վրաստանի կողմից ՆԱՏՕ-ին անդամակցելու վերաբերյալ ծրագրի (МАР – Mеmbership Action Plan) հատկացմանը։ Այս մասին վրացական «Ռուսթավի 2» հեռուստաընկերության եթերում հայտարարել է ամերիկյան պատվիրակության ղեկավար Մայք Տերները։
Նա ընդգծել է, որ Վրաստանն Իրաքում և Աֆղանստանում տարվող խաղաղապահ գործողություններին իր մասնակցությամբ ապացուցել է, որ հանդիսանում է հուսալի դաշնակից և անվտանգության երաշխավոր. «ՆԱՏՕ-ի ընդլայնումը որևէ երկրի համար սպառնալիք չի ստեղծում։ Ընդհակառակը, դրանով ողջ եվրաատլանտյան տիրույթում ամրագրվում է անվտանգությունն ու կայունությունը։ 2012 թվականին Չիկագոյում կայանալիք գագաթնաժողովում մենք հայտնելու ենք մեր աջակցությունը՝ կապված Վրաստանի հետ։
ՆԱՏՕ-ի ընդլայնումն արդեն իսկ պատմական հաջողություններ է արձանագրել ողջ Եվրոպայում՝ անվտանգության կայունության, օրենքի գերակայության, այլ ոլորտներում համագործակցելու տեսանկյունից»։
Տերները նաև հայտնել է, որ ԱՄՆ Կոնգրեսի Ներկայացուցիչների պալատն արդեն իսկ սկսել է դիտարկել Վրաստանի հետ ազատ առևտրի նախաձեռնության հետ կապված բանաձևը։ Նա ՆԱՏՕ-ի անդամ բոլոր երկրներին կոչ է արել վարվել համանման կերպ։
