Մեծ Բրիտանիան պետք է օգտագործի եվրագոտու ճգնաժամը` իր հարաբերությունները Եվրամիության հետ վերանայելու, մասնավորապես Բրյուսելին փոխանցված իր արտոնությունների մի մասը վերադարձնելու համար: Այս մասին հայտարարել է Մեծ Բրիտանիայի նախկին վարչապետ Ջոն Մեյջորը` ելույթ ունենալով BBC-ի եթերում Էնդրյու Մառի ծրագրի ժամանակ:
Ինչպես հաղորդում է բրիտանական The Daily Telegraph պարբերականը, Մեյջորը հանդես է եկել աշխատանքային օրենսդրության բնագավառում Մեծ Բրիտանիայի ավելի մեծ ինքնուրույնության օգտին: Բացի այդ, նրա կարծիքով, եթե Եվրամիության երկրները համաձայնության գան Հարկային միություն ստեղծելու շուրջ, ապա պարտադիր չէ, որ մեծ Բրիտանիան նույնպես ներգրավվի դրա մեջ: Միաժամանակ այդպիսի միությունը, եթե այն ստեղծվի, պետք է զգալիորեն փոխի Լոնդոնի և Բրյուսելի միջև տնտեսական փոխհարաբերությունը:
Մեյջորը կարծիք է հայտնել նաև եվրոպական տնտեսական ճգնաժամի մասին: Մասնավորապես նա հանդես է եկել Հունաստանի դեֆոլտը հայտարարելու օգտին, քանի որ, նրա կարծիքով, դա կնպաստի եվրոպական տնտեսության կարգավորմանը:
Ջոն Մեյջորը Մեծ Բրիտանիայի վարչապետի պաշտոնը զբաղեցրել է 1990-1997թթ.:
